كتبنا عن البيصير اطروحه
وصار النصب عا الناس مرجوحه
كل يوم بيقول بصياحو الديك
هونيك بالرايح من الهونيك
شقفة زمن عا الارض مشلوحه
ما منعرف المجرم من القاضي
وما في حدا من عيشتو راضي
منوُّ علينا الحق عا الطليان
ايام عم بتروح عا النسيان
وايام عم بتروح عا الفاضي
فِّلت فلانه الجوها هاني
وما في دوا لجروح احزاني
خضره النفس وبشهوتي مغيَّط
وكلما فقعت سكره انا والحيط
بشلح نظر عا جرين الخزانه
سألت الأنا بتهويت أيديي
عا لوين عم يهرب حواليي
طيَّرت عقلي بالشرق والغرب
ومن جمعتين عملت حالي درب
وناطر حدا تا يمرق عليي
شروقي
مبارح بنومة هنا كنا عادرب بعيد
وحايم علينا الزهر والعطر بيلالي
ولما الغرام اقترح تا نحّط ايد بايد
بالعين يا بو الزلف بلّشت موالي
حسَّبت ايد القدر عم تفلش زواويد
وتدلق عا جوع النفس تا يِرْخَص الغالي
ويصير عندي قلب ما بيعرف التنهيد
يخلّي ضروب الشقا تفزع من خيالي
وهونيك لما الغزل دق عْلَى وزن جديد
نامت عا زندي وْبِدِي التطليع بالعالي
تقلَّي بدقيقه الك وباختها ما بريد
وقُلاَّ يا عيني اضحكي للحب كرمالي
ولما عصرنا الهوى صار الحنان نبيد
وقلَّل وجودو الطفر تا يزيد رسمالي
وفصل الحرام انتهى وعاذمة التاكيد
غارت يميني لأَني مكارم شمالي
وما بين هيدا ضرر هيدا القلب بيفيد
ومن بعد كومة حكي صرّفت اعمالي
حسّبت حبي ابتدا ودقت جراس العيد
ولما عيوني فتحت قلت لزماني آخ
لو كان عمري حلم شو كان عبالي
شروقي
هردب عذاب النفس عا سحبة الافكار
الصارت عا مد النظر تتمخطر قبالو
الشهوه ضربها الجفا صار المحل قنطار
وما في بكرم الهوى عناقيد ينطالو
ولما رياح الشقا شدت باستمرار
خلِّت عبير الورد يفلت من خيالو
ونزلت وراق الشجر بلَّش لعب القمار
وبالربح صار الهوا عم ينشغل بالو
وبرمت غطيطة قدر داير مدار الدار
تا تشوف خيط الشمس وتنسِّل ديالو
وصارت هموم الزهر اعلى من الزنار
لما عليها الشتي جن وشلح حالو
يمكن بنعش الزمن عم ينضرب مسمار
ويوم النهايه بدي بتصريف اعمالو
هلي عا تاني دني عم يدرس المشوار
يدرس عا تحت الارض بيضل احلالو
نازع بلمح البصر آخر حلم ختيار
لما ببريدو العتم مرسال ودالو
وجو الاماني فضي صار برسم الاجار
من بين دين البشر عم تزمط الايام
وما في نهار بيجي عا اللحن موالو
صارت يا لولو دمعتي وقيه
يمكن حياتي ما بقا هيي
مصران ليلي منوصل بنهار
وحامل عا ضهري من التعب قنطار
ونوم الهنا تا نام ما فيي
بدي شي ساعه تعيرني دقايق
همي حمل والجو مش رايق
لحالي بحالي مالقيت محل
وعمري سهر طول الوقت بيضل
بيطلع الضو وبعدني فايق
ما قدرت لاقي للفرج معبور
الغليان ماشي والغضب بيفور
يا ريت كفي بتقدري تقري
بيضل بالفاعل شغل فكري
ولا مطرقه بيحمل ولا معدور
الراحه معي خسرت معانيها
وراحت الغفوه وصعب لاقيها
من ميل عم انقل لتاني ميل
تا شوف عتمه واقعه من الليل
غمض عيوني وانشلح فيها
دقت هنا وقلتلها انوُّ
جروحي من الهجران بيعنوَّ
مشوار قالت يا عصام عمال
قلتلها عندي شغل بالبال
بشهرين مش رح انتهي منوَّ
اكتر ما بدوُّ الحب مشتقلك
وانتي عا عقلك ما انزرع حقلك
بيناتنا صار الحديث عياط
وما ضل من عقلي ربع قيراط
وبالعمر عم يزغر كُبِر عقلك
قالت قصيده مدوزنه بديِّ
رده ما بدي بمنطق الجدِّي
وقت الغزل قلت الكلام بلاش
الناثر بيحمل مدفع الرشاش
والشاعر بيحمل فرد ردِّه
وجرَّبت غنِّي متل ما غنوُّ
من زمان هلي بحبها جنوَّ
ما قدرت لاقي للغزل معبور
قال الحرف طالع عا بالو يدور
بالبيت ما بيقعد غصب عنو
شروقي
اعطيني شي شلحة نظر تا يموِّج الالهام
وترغي بحور الشعر ابيات موزونه
هجرة عيونك الي بتسوكر الإعدام
بيكفي حياتي عقد لا تعقدي النونه
غيرك ما عندي حدا وبتشهد الايام
بالحب متل الحجر ما بريدك تكوني
عا الارض جينا خبر وما بتنتهي الالام
الطربون فوقو انكتب بتصير "سيكونه"
عا حساب قلة عقل عم يكتروا الاوهام
الكانو بليالي الضجر حسنات يعطوني
وكلما بغفلة سهر عن على بالي نام
بتعزم عيوني القلق يا تقبري عيوني
الشهوه بحجم السما لا تمثلي افلام
انرحت على تاني دني شو بتنفعي بدوني
دمع العاخدي جري عامل تلام تلام
وبالاخ قال الوجع عالعين لاقوني
صاير حديثك معي علامات استفهام
بالرغم اني قلت عالروح بتموني
كلما عا ذكرك اجي بكوِّم ورق وقلام
وبخلق قصايد بكر تا تطالعي شو صار
مجنون فيكي انا ومساقب جنوني
شروقي
عا البال جيتي خطف جيتي خطف عا البال
وعرم عا قلبي الفرح حسَّبتك رضيتي
صرت بخميرة فكر اعجنلك الموال
ويرّق وزن الشعر "عا وعدك بقيتي"
وحطَّيت زخم الوحي وشلت الما عم ينشال
وخليَّت ساعة زمن تمشي بتوقيتي
تا بكل دقه معي تتصرف الاعمال
وبالحب جمر قبل ما شوفك غليتي
ومنشان تنقش معي ويقصر لسان الحال
البيقول حظي انقرا عا كف عفريته
فيقت جوع النفس عا وجبة الامال
ونيمت قش الشقا بخيال كبريته
وما بين اخد وعطا لما ضميرك جال
قلِّك شو جاب الزعل عالحارك حكيتي
قلتي عليكي العتب كان الغرور جبال
وحس الحديث انقطع وبكيت وبكيتي
ولما اجاكي الفزع صارت زنودي شال
عزمتك عا راحة فكر وهمومك نسيتي
لكن بدار الطفر ما طوّل الرسمال
وقت اللي صار العقل يستفقد التفكير
من البال رحتي متل ما حضرتك جيتي
شروقي
معبر حروف الهجا بابرة فكر مشغول
وجايي تا خيّط لكي فساطين شعريه
تا يجن جوع اللمس عا شعرك المهدول
وتفيق شهوة جسد غفيتها فيي
بشوفك عا باب السما كلما الأبانا قول
هربان مني وصرت للناس خبريه
عا الخد دمعي جري وصار الوجع اسطول
وما ضل مني حدا لهزات ارضيه
شفافك معامل قطر وخدودك المعمول
وكلما ابتسمتي الدني بتصير صيفيه
اعطيني شي وعد "خلنج" تا واجه المجهول
ولو كان بدُّو يجي بتربيح منيه
وعالسكت مشِّي الحكي وخلِّي الحديث يطول
ويدلق بقلب السمع لمعات سحريه
نحنا عا درب الهوى وشم الهوا مكفول
وممنوع يمشي الفزع ببلاد حريه
من الهم قلبي انقطع مَنُّو الهجر مقبول
مش رح بضاين معك عا هيك عينيه
خلِّي غيابك الي يعطي عذر مقبول
تا يطير فيي الفرح وتقلك اللهفات
يا ست انتي الشمس والشمس مش هيي
شروقي
مبارح غا غفله اجت تا تزورني "الهام"
وما كان عندي حدا والصوفره بداري
قالت بشعرك صرت متولعه يا "سام"
جاوبت متلك انا حبيت اشعاري
وقرَّبت ليها وقلت عا سيرتك عم نام
ولا شك راسك لقي عا مخدة خباري
لازم بيقظة عمر يتفسرو الاحلام
برَّيت درب الهوى بدعسات مشواري
وحسَّبت حالي صرت "عبد الحليم خدام"
نايم عا حصة "اسد" والحظ بجواري
لما عزمني الوحي عا سفرة الالهام
قلت لحروف الهجا التجنيد اجباري
وبالحال دار الغزل وتبددو الاوهام
وعالسكت عقلي نقل من راس منخاري
حسَّيت انو الظرف قلي صبت العلام
قول لبنات العصر لا يبكلو صداري
ولما عا صدر الحلو صار النهم رسّام
عا البيت جات المرا وتبشللو فكاري
قالت يا ازعر قلت لا توجهي الاتهام
عم شيل ربش الكتف للست من قدَّام
من خلف ما بينكمش لا تبلشي تغاري
شروقي
يللي عشقتي الجفا بعدك بقلب البال
وبعدو حنيني لكي بيشد اوتارو
جايي بطوفة دمع تا سمعك موال
مهندز عادرب السمع دعسات مشوارو
اعطيني شي شلحة نظر من موسم الاقبال
جنز ربيع العمر احلام ازهارو
عا حساب قصر الفرح صارو الهموم طوال
الكاتب كتابو الشقا يا الف شحارو
مش بس انو الجسد للغير رزق حلال
صار التفاهم معك مجهول دبارو
لا سلام عم تبعتي ولا بتبعتي مرسال
ويا ريت بيت الشعر عم تدفعي اجارو
تشرين خلفك مشي وصارو السنين قلال
ويوم النهايه بدي بتجميع افكارو
اعطيني دخيل السما شي يوم استقلال
تا يصير كاس العمر يتلت عيارو
التجعيد فيكي انغرم وتبدلو الاحوال
منِّك بعهد الصبا خدودك درج صارو
تلتين عُمْرك مرق شو ناطره ما زال
كرت العزيمه اجا ويوم السفر عالباب
البيروح من هالدني عم تنطفي خبارو
الاهلا ويا سهلا الك يا ريِّس «سليمان»
قلبي فتحلك قبل ما تدق عا بابو
عن سطح بيت الشعر قايل انا من زمان
«ميشال» ابن الاصل وكتار احبابو
بلبنان كان الوضع اكتر من التعبان
وعا الرمل ساحب عصا تا يضرب حسابو
ووقت اللي عهدك اجا وتغيَّر العداَّن
محىَّ خطوط الكبر واسترجع شبابو
قلت بخطاب القسم النا باطرى لسان
مش رح تخلِّي الوطن عايش عا اعصابو
وعا الجو لما رجع من غيبتو الايمان
ما عاد حط الكفر ايديه بجيابو
الخدمه بجيش الوطن عطيت الك نيشان
ومعلوم قلت الدهب ارخص من ترابو
وكنت الصريح وكنت للمكرمه عنوان
وهم العطانا وجع سفرَّت اسبابو
ومش بس انك بطل كونك عظيم الشان
لما التوافق مشي صفيَّت عرِّابو
وجيت على سدني ومعك جايبلنا لبنان
وكل اللي قبلك اجو لبنان ما جابو
وعلامة استفهام ما خلاّ
انسان حد السيف من حدُّو
مليون يخزي العين وسملَّله
اخبار عنوُّ اهلنا ودوُّ
لبنان وجهو بطلتو تحلىَّ
كتار اللي قالو ما حدا قدوُّ
عليه الزمان باصبعو دلىَّ
هدوُّ بايدو كلكم هدوُّ
بالهيكل وبالميدنه صلىَّ
جايي الفرج لا شك عن يدو
من بير لطفو وجودنا ملىَّ
انعدوُّ اللي متلو عندنا انعدُّو
قادر زمام الامر يتولَّى
غيرو بيقول الشعب ما بدوُّ
«ها الاشرف الريفي» بلسان الحال
اسمو عا كسمو يحرسو الله
مع كل شمخه في الك موعد
جوّك صور للشاعر الفنان
هلِّي بطموحو حلَّق وبعّد
بجوهر كلامو تخلَّد الانسان
وسجّل الو بالذاكره مقعد
والسبعلي بعدو قمر نيسان
ولو كل خصله ببشرتو جعَّد
بيبقى الحلو بيبقى عظيم الشان
واللي بيقولو هالكلام كتار
لبنان عندو اسعدين كبار
اسعد الخوري وسبعلي اسعد
شعرك يا اسعد حقق الآمال
بيطرح ضعف والمقدره بيجمع
بسحبة وجودو تصّرَّفو الاعمال
وعا كل وزن وقافيه بيلمع
وعا كل تله في الو موّال
من هيك قالو وقلت شو بيمنع
سبك القوافي تعلِّم التمثال
يا اسعد القاعد بحضن البال
تا يضل فينا كلمتك نسمع
ويا شاعر الفاتح بعبَّك دار
ساعة لقاك العيد والمرفع
تمثالك بسبعل بلهفه صار
يسلِّم عليك وحاجبو يرفع
خيالك طليق وفشختك مشوار
متل الدوا اقوالك بتنفع
مفروض يبقى شعرك المختار
بالصيدليه مرجع الافكار
تا كل كلمه حقها ندفع
تمثالك تفصَّل بدقه عليك
وعا ارض فيها العافيه تربَّع
ساعة ما بدو بيقشع بعينيك
وساعة ما بدو كلمتو بيطبع
وانت المحبه بتقطف بإيديك
من سبعل الفيها الوفا منبع
وقال الزمن انو بدعس جريك
موجة غلا طرقاتها مشبعَّ
من هيك بيقولو البشر من هيك
ما في طريق بتنشرا بالمال
ومطرح ما هلق واقف التمثال
بإنسان صار المتر المربَّع
يا ضايعه بعجقة حواليي
من كل حالي نفضت ايديي
بدرب الوحي عم يعرج التفكير
وقاعد عا سحبة قلة التدبير
وساعة خلاصي واقفه عليي
لعندي بتجي الاخات يوميه
ومغيره فصول الطبيعيه
اسمي ما بعرف بالدني شو كان
الهمه ضعيفه والوضع تعبان
وتا اطلع على البال ما فيي
عمري بسكره ضيع سنينو
ومنها بعيده يحترق دينو
وعا سيرة الاشكال والالوان
عندي بحضن الذاكره انسان
بضرب الرمل ما بينعرف مينو
همومي عا غفله مبارحه جوني
واليوم مش عم ينعرف لوني
محتار شو بعمل بقلب الكون
هونيك بدو يشيلني من هون
وهوني ما بدو روح من هوني
بالسوق كنت وحامل بديي
ومرقت هدى قدام عينيي
ولما ما كانت للهوى تندار
بجاه السما قلتلها شو صار
اخدت وقت تا ردت عليي
قالت الي: صبّحتك وإني
رح ضل عيطلك ابو إنه
شو باك ما رديت عقلك وين
قلتلها ع الدرب من يومين
يسعد صباحك واقعه مني
وتا قول كيف الحال ما فيي
والمرحبا منها طبيعيّه
ولمّا من الأهلا ما جاني عرض
لميت شقفة مرحبا من الأرض
تا عوزها طلعت مهتريّه
بدي شي كلمه بهالدني جديده
بالملتقى ما تكون برّيده
محتار شو بعمل مع الستّات
ما في حروف تركّب سلامات
وغير الوما مابيطلع بإيدي
حبي لكي تعبان لكنوُّ
بالمجتمع كاشف على سنوُّ
البسمه لعندو عم تجي بالدين
العالم بأني رحت لا يظنوُّ
يومين باقي من العمر يومين
متل الجرس بالادن بيرنوُّ
ولما بحجر ما صبت عصفورين
قلت لظروفي تفضَّلو جنوُّ
من بعد ما ودعَّت يخزي العين
قلت لجروحي بالهوى يئنوُّ
قانون حبي في الو حدَّين
لحقو تلف ما بقيت عم سنوُّ
ما قلت ردة شعر من شهرين
وحياة عينيكي اعرفي انوُّ
هربو المعاني صوب اخر وين
وكل القوافي طلقو الاوزان
والحرف عاملها تحت منوُّ
الحاله يا لولو ما بقا هيي
والكان ليي ما بقا ليي
ما لفيت عا حالي بعد ما لفيت
علَّواه لنِّي من بني كبريت
بقدح زمن وبوَّلعو فيي
مبارح عليي تدحرج لساني
ومني وقع عا الدرب عنواني
ولما لبطحات العرق غنيَّت
ضيَّعت ساعة رجعتي عا البيت
بالرايح من نهار الفلاني
ودق القلب عا تصوفر جيابي
وعم تطلع الالحان كذَّابه
حبي عا شكلو بالدني ما لقيت
بالامس عا حساب الهوى جنيَّت
وهلق انا رح جن عا حسابي
شرقت الشمس وقالت الظلمه
ما بتنتهي تا ينتهي حلمي
وهوني انا بين المضى والان
بالبال عم يمشي الحرف عريان
وافكار عم تركض ورا الكلمه
يا هلَّي جوَّكم ما انعَّد صافي
ومنكم ما حدا اسمو الرصافي
عا ابجر وهمكم انتو اعتليتو
ومعكم للابد قايم خلافي
بوقاحه للملا «نقدي» شكيتو
وما قلتو منين بتجيبو اللطافه
بصراحه لشعرنا عِّله انسميتو
وعا درب الوزن ضيَّعتو القوافي
دخيل الرب قولو شو عَطَيتو
منكم: للمنابر والصحافه
بكلام الما الو طعمه اكتفيتو
ما فينا نقول يعطيكم عوافي
قلتو نشَّف الالهام زيتو
وشعرو مناسبات وبس: ما في
بلاغه تعمِّر على الاوف بيتو
تا يقدر بالوحي يقطع مسافه
اسمحولي قلكم شهره اشتريتو
ومن الايمان بتكون النظافه
انتهيتو قبل ما انتو ابتديتو
تراث بلادنا قطعتو نصيبو
وثقافتكم بشرعي من السخافه
لا تساليني لوين متقلع
بالشعر بيتي مقاطع المطلع
ماشي عا دعسة يمكن وتخمين
وحالي لبست من دون الله يعين
وطالع عا بالي حضرتي اقلع
رابط مصيري والفكر سارح
ولا بنعرف جامع ولا طارح
ووقت اللي شفت الخمر صار موَّي
جربت روح على عبكرا شوَّي
طِلْعِت بوجهي خلقة مبارح
حقي معي ان جيت اتخلق
لا مزَّوج ولا بدمتي مطلَّق
اول مبارح كان عين وزين
وهلق انا ضايع بهون ووين
ويمكن عبكرا موت من هلق
صفي حسابك بالهوى صفَّي
وكلما عا بالي تطلعي تحفِّي
عذرو معو هلي بحلاكي جَّن
تخمين انتي من بنات البَّن
وبيشربوكي الناس بالشفه
