شروقي
«بليلى» التقيت وكنت من قلت التدبير
ضايع باخر انا والفكر بشرودو
رميت السلام وقلت فيكي صرت عم طير
لكن جمالك صلى عا موقفي فرودو
مش بس كلك لطف فيكي الحلا قناطير
وهلق جمال الطقس لحَّن على عودو
وبحلف برب السما عندك مقام كبير
وذوقك عا طول المدى عم يفرض وجودو
«وليلى» لأنو الاسم ممنوع اعمل زير
اسمك بنسمة هوى بيهب بارودو
ان لوَّح بايدو الظرف بالحال «قيس» بصير
وبعزم حراره لطقس متقمَّص برودو
ولما قالتلي اللمس تاسفرِّو بكير
ومعروف جوعي لها ما بيعرف حدودو
وديَّت خلف الهوا البيَّطير تنانير
حتى لعندي يجي ويُشْمر على زنودو
هوني انا وهونيك الهامي
ومش عم يجي عا البال الهامي
عا سليق قلت بعيش باستمرار
بلكي القلب بيصير قُوامِّي
وساعة ما طقسي تعرَّف على غيار
وعقصو العقارب ساعة دوامي
وعرفت الزفره بجيبتي دولار
لعندي اجت تا تكسر صيامي
ما في فرح عا الارض يرخي بدار
بصرف ونحو تا اعرب اسامي
التقصير حاطط عا الدروب حجار
ويا ريت فيها تقوم القيامه
بعت الوقت تا اشتري دبَّار
وعا شغل بالي وصّل سلامي
وساعة زمن ما لقيت بالايجار
تا نام فيها وابصر بنامي
محتار شو بعمل معي محتار
ما بيقعد ولا بيوقف كلامي
منيِّ عا ذوقي وحيرتي قنطار
طالع عا بالي روح مدري لوين
وحاطط ما بعرف ليش قدامي
يــــا شعبـــي الفيــــك تاريخـــك تَــبَــاهـــا
عــذابـــك عــــم يعيــــش اليــــوم فيـــي
اذا مـــا كلمتـــــك علّـــــم صــــــداهـــــــا
صفـــــوف الجـــو، بتمــــوت القضيّــــــه
الحيــــاة تـــزوجـــت وجبــــة بـــــلاهــــا
بظــــروف مطلقــــــه اللقمــــــه الطــريـــه
الـــوجــــع بـــالـــراس عـــم يركـــض وراها
تــــا يعطــــي الآخ صـــرخـــه جهنميــــه
الــــزعــــامــــه الفارغــــه خــــزِّق عبـاها
عبـــاهـــــا تفصّلـــت عــــا المجــــدليـــه
لأنــــــو شمخـــــة جبينـــــك دواهـــــا
بــــوقفـــــة عــــز مــــــش بــالصيدليــــه
انتفــــض عــــا الشلّحـــــو العيــشه صفاها
انتفض عــــــا التــــاجـــرو بـــالطــائفيـــه
انتفـــــض تــــا المعـــرفــــه تــرفع لــواهــا
وبــــدنــــية هــــون نعــــرف ويــــن هيــي
بـــدنــــا ربـــوعنــــا العـــافــــت سمــاها
تـــرجــــع متــــل زهـــره بمـــزهريــــه
وبـــدنــــا الشعــــر يجمــــع مــــن شــذاها
قــــوافــــي بكـــــر ومقـــاطـــع قـــويــــه
وبـــدنــــا بيـــوتنـــا تجـــدّد صبـــاهــــا
بعـــدمــــا ختــيـــرت بـــالمدفعيـــــــه
وبـــــدنـــــا العـــاطفــــه تــــاخـــد مـــداها
وهـــويّـــــه تظهــــــر عْلـَــــــى الدِيـن بدنا
مــــا بــــدنـــا الـــدِيـــن يظهـــر عا الهويــه.
بيـــن المقــــابـــر هـــون ماشــي عـا الهدا
ومـــاشـــي معــــي التفكيــر عا لحــن الحدا
هيــــدا حيـــاتـــو ودع بعـــز الشبـــــاب
وعــــا فجـــر عمـــرو مـــا نزل نقطة ندى
وحـــدّو مـــرا بتــرابهـــا فــرَّخ عشــــاب
كـــانــــت حـــدا واليـــوم صــارت ما حدا
وبنــــت بصبـــاهـــا حـــوَّل عليهــا الغياب
صـــارت خبــر والمــــوت صـــار المبتدا
وشـــاعــــر كبيــــر لكلمتــــو فصّـل تيــاب
وكــــان علـى خشبــــة منبـــرو يطول المدى
ومطـرب زمـــانــو كــان عــم يضرب حساب
يغنّـــي الــزمــان ويكمـــش بـــإيــدو الصدى
مـــا فـــي حـــدا عـــالموت يعمــل انقلاب
"بطـــول العمـــر" ممنـــوع واحــد ينعدى
هــلِّــي اجــا عــالكـــون مكتبلـــو العــذاب
وهــلِّــي انكتبلـــو عـــذاب طــرقاتو ودا
وبــالمختصـــر رضـــوان مــا بيفتح بـواب
بقـــرص السمـــا وطلباتنـــا راحت ســدى
ســـألنـــا الحيـــاة وحــالنـــا وكــان الجـواب
"آدم وحـــوا" بهــالدنـــي مــوســـم خضار
اللــي بيطلـــع مـــن الارض الهـــا بينهــدا
بالحلم شوقي قبنَّ قناطير
وعنّ على بالي عا بلادي طير
ولما وصلت عا ضيعتي بلبنان
صوب الدني الفيها زماني كان
حبيت اني اقدح مشاوير
نقيَّت درب بتقدر تودي
لمطرح ما كانت فرحتي قدي
ومن بعد سحبه بقلب البساتين
شلحت النظر صوب العنب والتين
وما قدرت اقشع متل ما بديِّ
التينه الزرعتا بقلبها حرقه
من البرد صارت كلها زرقا
ومش بس انو رايحه بالعرض
مسامير اجريها عا وجه الارض
وما في بجيبتها ربع ورقه
وهونيك شفت على كتف غبيِّط
عصافير سودا بتشبه وطاويط
وزهره عليها الريح متسطى
عا الارض كانت عاملي غطهَّ
ونايم عا ديها اربع جلابيط
يا حباب شيلو الزير من بيرو
وفيي بشي فرحه دخلكم طيرو
المشكل لعندي قوام عم يوصال
وبالدم عم ادفع فواتيرو
شلحت النظر تا شوف وين العال
وان كان عم تضحك اساريرو
لا عم عندي بالدني ولا خال
وفي ناس خافو اوادم يصيرو
خف الحكي عا الهاتف النقال
وصوب السمع قلل مشاويرو
وما في وما بالايد عم ينطال
تا لحّم الواقع بقصديرو
كلمة يا اهلا ما بقا تنقال
وجاب الضجر للقلب تعتيرو
لاتسألو ان كان ماشي الحال
واقف لانو في وجع بالراس
وما في شفا اقدر استعيرو
وينك يا ام عيون خلينِّي
شوفك قبل ما يحترق ديني
كرمال تا يبقى المقام رفيع
طالع عا بالي اشرح مواضيع
ما زال امري صار يعنيني
كلمة يا اهلا مندفع حقا
وبالحب مش معقول اترقى
صوب النهايه قاطع مسافات
من بعيد حاجي تشلحي بوسات
لانسان ما بيقدر يستلقِّى
نحنا يا ولدي هيك ما كنا
قبل الشلح عم ينطلع منا
علينا الضعف عم يشهر سلاحو
لما هممنا تفضَّلو راحو
رحنا عا مدري لوين من عنا
عنك وعني طالعه اشاعه
وظرفك وظرفي الجو ما راعى
لا راضيه انتي ولا راضي
قومي تا حتى نروح عا الماضي
ونبادلو الساعه بربع ساعه
لكومة همومي الشفتهم جلبه
ما لقيت ايجابي ولا سلبي
غب عْلَى قلبي والغضب نصحان
وقاعد انا والكاس والحيطان
بقلة حيا ومكتَّر الغلبه
ما في وضع يستاهل الزقفه
وقفت وما شفت العز بالوقفه
ما قدرت اني كون فحل الوز
ما في وزن بالفكر عم ينهز
والقافيه صارت فرد شقفه
ما قدرت حقق بالشعر حلمي
ومنِّي حدا صفيَّت عا علمي
ولما الضمير الحي دق جراس
وقال الصمت عن جد كبَّر راس
اجتمعو الحروف وطلعَّو كلمه
ومنشان افتح باب عا كّوْني
ويمرق عا وزن وقافيه لوني
طلبت الوحي تا يصِّرف الاعمال
ولما عا راسي شرَّف الموَّال
قلت لسكوتي روح من هوني
صرلي سنه دوِّر على ذاتي
بين المضى ومستقبل الاتي
وقعتها مني انا وسكران
بالدم كانو تقال عرقاتي
الراحه ضعيفه والوجع نصحان
ومبحبحه بتضل اخاتي
من عب صوتي هربت الالحان
وعا بو الزلف ما جات هيهاتي
وهلق انا من همتي طفران
بابرة مشي معبَّر مسافاتي
ورايح بنزله مخلَّفه حجران
يمكن عليها يطلع خواتي
صارو عيوني للدموع جران
وما علَّمو بالرمل ضرباتي
وكيل الغضب عا ذمتي طفحان
ان كنت فيكي يا هدى موجود
هاتي شو عندك من أنا هاتي
ما شي سكوتي وواقف كلامي
وقلي الفرح عاذمة بنامي
جايي لعندك بعد خمس جماع
طعاج الدرب تا يصير فيها كواع
لعندك انا ما بروح قوَّامي
ما في ظرف عم يمرق عليي
تا بهمتو اوقف عا اجريي
وافرش طريقو بالورد والفل
وقلوُّ ما بدَّي ساعة البتفل
عا نهايتك تاخذ حواليي
بجرِّب تا حتى ساير زماني
وما في حروف تدحرج لساني
طاير صوابي وخاطري مجروح
ولما لعندي قلت بدِّي روح
بْرّمْت الارض ما لقيت عنواني
وراحت الهمه وجاتني اللبكه
وبالعمر صارت تكبر النكبه
ولما معي ما تغيرَّ العدَّان
جربت قودم عا درب حفيان
رِغيت تعب صابونة الركبه
