الصفحات

ننشر في هذا الموقع أشعار الشاعر الكبير عصام ملكي

خريف العمر

خريف العمر ختير إنطلاقي
وقالت ورقة الصفرا بطلاقي:
اذا ما الريح طيّرني بجناحو
السفر بيكون عا حساب السواقي

ما عاد الخير يسعدني صباحو
ورفاقي بطلو يكونو رفاقي
وهلي تجنسو بالبال راحو
تا إغلي ودوب عا جمر اشتياقي

القدر عا هيبتي شاهر سلاحو
يميني شالها وحاطط بساقي
وبريد الآخره سوكر نجاحو
وما قلي: متل ما تودع تلاقي

أنا إنسان عم تنزف جراحو
حياتي قدمت ساعة فراقي
بعد ما الموت يعلن اجتياحو
البيحبو الشعر بدهم يذكروني
اذا التاريخ بيلملم وراقي
 

موت بغيابي

جيبي الابانا وجنزي شبابي
جخ الوجع بالراس عا حسابي
كتابي كتبتو للدني تذكار
وهلق عا همي كاتب كتابي

وان كان بدك تسمعي الاخبار
بنفخه العذاب مطيّر صوابي
وكلما عا صوبي هندز المشوار
بنص الطريق بيطعجو ركابي

وكنو بظروفي مشغله الافكار
خلي الطفر ينقل من جيابي
بلكي اذا بستفتح بدولار
بيبدي الفرح وبينتهي عذابي

قبل الجمر واقف عا خط النار
وداير بعكس الحظ دولابي
وصارو عيوني للدموع جرار
وساعة خلاصي واقفه ببابي

وهلق عا كترة قلة الدبار
جنيت رح اطلع من تيابي
الابيض بلون الليل عندي صار
ومش قادر دقيقه بحضوري عيش
وخايف لا اني موت بغيابي.

لحقني الموت

البيموت لازم يكتب وصيّه
انو انتهى ميه على ميه
بيكون جسمو نشّف من الزيت
وما في الو عالارض يدّييه

ومره السخونه بالهوا شميت
بظروف ما بتنعد عاديه
فزعت على حالي وعشرتي عديت
وقلت النهايه هون هي هيي

سمعت الفدائي عم يعمر بيت
بقرص السما ولوازمو هديه
لكن ما خدت على الحكي ولا عطيت
تا بقبش بصوره طبيعيه

ودّيت صوت على السما وما لقيت
مين البيرد بكل حريه
ونمت وبنومي قبل ما تهنيت
شوفو شو صار بوقتها فيي

بحلمي لحقني الموت وتواريت
تحت التراب وصرت خبريه
ولما بروحي عا السما عليت
عا مفرق الجنه شفت عامود
وبالصف ما كانوا الفدائيي

دقة قلب

شلحت نظرها وصمتها قلي
لازم علينا كسور ما نخلي
مشينا الحياة وخلفنا تشرين
وما بين ساعه واختها الفلـّه

وهيي قالتلي يا عصام بدين
حبك لانو دوختك هلي
لا رب في الها ولا الها دين
ولا بتعرف تبخّر ولا تصلي

والها جوابي كان الله يعين
بفصل الضجر بمشاكلي تسلي
بكرا بيصيرو ولاد عشر سنين
عليهم طلوع الاخ بيدلي

منك ما بدي اهتمام ولين
جايي تا بيع هموم بالسله
وجايي تا حتى زور بشمزين
وحد الحجر استفقد محلي

مهما الكهوله تفرض قوانين
بيضل عندي للهوى حلـّه
عني ما فيهم يبعدو الحلوين
يعني اذا رحتي على المريخ
دقه عا باب القلب بتضلي.
 

الأرض بالدين

من الخيط صاير حظنا أرفع
ومنهوبر وراياتنا منرفع
عنا النسر من نمرة البوحنين
وكلمن عا غيرو صار يترفع

نحنا شعب من جيل بو ضرسين
بساعة غضبنا خدودنا منصفع
ومن حيث عم نلعب على الحبلين
منا الضرر عم ينحسب أنفع

وكلما حملنا كلة الايدين
منقول معنا كلة المدفع
واللي حفظ بالمدرسه حرفين
بيعد حالو "ابن المقفّع"

يا شعوب الله فتحو العينين
غير الصلا والصوم ما بينفع
خلقنا بهم مننتهي بتنين
وفينا ما عنا مين يتشفع

لا تسألو منوين جينا لوين
وكنو لنهاية صومنا مرفع
الارض اشترينا من السما بالدين
وكلما جسد بترابها ينطمّ
منكون الها قسط عم ندفع
 

غزل

دقت البلا وأيوب قدّي ما صبر
وخشمي انكسر ولحدّ هلق ما انجبر
وهلق عيوني بلشو يحكو عبر
وجسمي عا سفرة سكري بياكل إبر
ولما مرق عالعمر فحص المختبر
قللي: عا وجهك علمو كفوف الكبر
ومنوين بدّو الحظ يفتحلي مجال
وكلما التقيت بمبتدا بيطلع خبر؟

قللي ضمير الحب: فتّح عينتين
وخلي العلام تلولح بضهر الطنب
فوق اللي عندك زيد هلـّق حلوتين
عملهم تلاته مش رح بتعمل ذنب
مشيت على ذوقو وما قدرت اعرف لوين
رايح انا وللمشكله فرّخ ذنب
لحلوه من الحبيتهم ما وفيت دين
قالت: ما زالك هيك ببقى عا جنب
ودّعتها وما ضل عندي غير تنين:
بنت المعنى وبنت عنقود العنب

قالت: يا ملكي كنت عم عدّك مليح
ليش عم تصوفر كل ما تمرق هنا؟
قلتلها: لا تزعلي الملكي صريح
لحوا عا راسو الف مدماك انبنى
لبنتك انا ما بصوفر وهيدا الصحيح
بغني لها معنـّى وعتابا وميجانا
جيابي اللي عم بيصوفرو وحق المسيح
مش انا وحياة عينك مش انا

يا ناعمه من بعد ما العقل انبهر
بسكره عظيمه جوّها فيها اشتهر
قلت لخيالك بالهمس لمّا ظهر
لا تروح طوّل سهرتك قلبي انقهر
وتا كون قدّ الحمل بالليل الطويل
نزّلت عني النوم تا احمل سهر

عشت العمر طيّار ما خفت الغرق
ومع مية حوا كنت موضوع انطرق
دقيقة فرح مني ما كانت تنسرق
كل الحلو عا سحبة لساني مرق
وعن غصن عمري بعد ما هرّ الورق
راحو اللي كانو يتلتو بجسمي العرق
وما ضلّ إلا بنات دينيّي التنين
يا يقبروني وأربع بنات الورق

مدمن انا وكاس المحبه سين ميم
وصعبه عليي قيمة الايام قيم
لما هجرتي صرت بهمومي مقيم
وما عدت إمشي عالسراط المستقيم
من هيك لما تفتّق الجرح القديم
دوّرت حالي وقلت: رايح عالجحيم
وصارو عيوني يفرشو دروبي نقط
وكلما بنقطه أوقع يجيبو الحكيم

ضيّعت صوتي وصرت بقبش بالصدى
وقصر المدى استعرض وطول المدى
ولما بصباح الخير طلقني الندى
جيتي عا فكري وكان ما عندي حدا
وتا يضل فيّي إسكر وطيّر صواب
دلقتك بكاس وصرت مزمز عالهدا

يا طايره قولي شو بدك عالهوا
حتى عا خط الإستوا نمشي سوا
غط الوجع عا مصيبتي وفلّ الدوا
والحظ قلل هيبتو ومجدي هوى
ولما لقيت الصبر ما منو نوى
وبيقظة الشبعان نايم عالطوى
بكركة ضميري شلت نزل من الحكي
وجايي تا قلك كيف دوبني الهوى

بحبك كتير وقلبك بقلبي اعتنى
وكل الدني وخيراتها خلقت لنا
قلتي الي من زمان عا دروب الهنا
انتي وانا انسان واحد يا هنا
وتا شوف كنو تنيننا واحد فقط
زرعتك بحوش البال فرختي انا

قلتلها: يا ناعمه القلب احترق
عا قطوع حظي قبل ما اخلق مرق
باب الفرج ممنوع انو ينطرق
وحلم اللي عاش بيقظتي مني انسرق
اعطيني عرق محروق عا نقطة عرق
لا توعديني الوعد حبر على ورق
قالت: انا بيكدّني ليل ونهار
تفضّل يا قلبي وقوم بقبش عالعرق
منك انا بالحب عم آكل فلق
الغمزه زبط عالقلب والنظره طلق
بشعر الغزل يا لابسي عيوني حلق
ما قدرت عنك قول: سبحان الخلق
بطلوع اوفي قصّرو كل الحروف
وفوق الكلام الجوهري السكت اندلق

لما التقينا الملتقى لقلبي جلب
مليون همّ وصرت متل المنصلب
وحظي بعدما كان عا ذوقي انقلب
وصار بلا طعمه متل لحم البلعلب
قلتلها: حني عا أمري منغلب
وقاطع مسافه متل ما هون وحلب
كنو غرامك عا جهنم سفريات
طالع عا بالي سافر بأول طلب

كانت عا هوني "بلاج" هلي صايره
من كل سمرا بمجتمعنا غايره
قلتلها من بعد يوم مسايره
ليش السمع للآخ منك عايره
قالت لأني بابن آدم حايره
بلا عقل صاير والغلاظه دايره
قلتلها غطي عواميد الرخام
تا ترجع تغط العقول الطايره

الخريف

شروقي

هزّ الخريف العصا تا يصرف الأعمال
وقالت خيوط الشمس: رح حيك غروبي
خفف عيارو المشي وعم يكبر البلبال
واصفرّ لون العشب عا مساكب دروبي

وأرض التركها العطش حرمه بلا رجّال
ما عاد فيها الزرع يطلع بأعجوبه
زعلت عليها السما وصار الدمع ينهال
والشلش قام الركض تا تلحقو رطوبه

ومنوين بدّو الفرح يجمع إلو رسمال؟
تركو خيال الطفر بجياب مقلوبه
والشعر بحرو نشف من خلقة الموّال
وفصّل بإيدو السكت للحرق غيبوبه

وما عاد شمّ الهوا يخطر عا درب البال
قال بجنون الطقس غيّرت أسلوبي
وتوب الجمال انخزق وتبدلو الاحوال
وصارت غصون الشجر لما ضربها الجوع
عالأرض تشلح ورق تا تاكل غلوبه.
 

فشخة حبر

عليي يا ريت بتمرقي مرقه
بدورة حياتي مجنسه الحرقه
وما في امل اعمل جنوني فنون
بصحن الخيال منشفه المرقه

تحت الشتي رايح على بدادون
وحظي ما كان من الهمج ارقى
وشمس اللي كانت تطلع بكانون
ضبت بايد غيابها الشرقه

وبيت القصيد لطلعتو مرهون
وجابي الكلام ملاحقو بطرقه
ومش بس قلبي بالوجع مطعون
عم ابصر بنام الربع ورقه

مطرح ما انتي يا عيوني بكون
شفافك لهيب وبسمتك برقه
وحبي لكي عا العود والقانون
غنّت جناحو بالسما الزرقا

وصوتك كأنو نغمة الحسون
وحتى ببحري تغرقي غرقه
ما قدرت اكتبلك شعر موزون
من هيك طلعت كلمتي عا العيد
فشخة حبر عا هامش الورقه.

الى روح الشاعر ميشال قهوجي

التكوين ... قبلو كانت الكلمه
وهزت الكلمه الكون عا علمي
بدي شي كلمه بهالظرف تنشال
من قلب قلبي، وتوصف الاحوال
سيطر عليي الهم يا ميشال
ولما معي ما تصرفو الاعمال
منعت الحروف يميدنو بالبال
لما ما قدرو يطلعو بكلمه

جربت اكتب عنك شويي
زق القلم من بين ايديي
صرلي بخيالي كم سني حاكيك
نسخة اصل عن لهفتي بعطيك
الا مخلص شعر ما بسميك
بعيون شعري اليوم عم ابكيك
ما ساقبو للدمع عينيي

يا قهوجي، يا محرك بشعرك جماد
مش بس بدي فيك عزي موطني
بقدم تعازي لبنت عمك، والولاد
وللاهل والاصحاب من باني وبني
وبقول انو قلوبنا صارت رماد
ومن بعد موتك هالدني منها دني

كنت الزجل عن جد رافع رايتو
والامتنان يزود خدودك قبل
وعهد البلاغه فيك حقق غايتو
وشعر البلا طعمه ما كان بينقبل
شاف "بأدب شعبي" الشموخ عنايتو
"وبصوت شاعر" غرّد "وصوت الجبل"
وكنتو تلاته مشنكلين بدايتو
ومجلة البيدر عم بتجمع سبل

يا شاعر الفيك القلوب بيكبرو
من بعدك الشعار رح يغلو حصى
وبدهم حروف الابجديه يختيرو
ويصير يمشي الارتجالي عالعصا

ويا ارض نحنا منك وجوعك فريد
ومين اللي منا عا ترابك ما غفي
عم تاكلينا من قريب ومن بعيد
وبواحد وبتنين مش عم تكتفي
عملك اله الكون ساحه للعبيد
حاجي عا ذوقك بالدني تتصرفي
خلي العقارب يعرفو مين الفقيد
وعودي دقيقة صمت عا ذكرو وقفي

الى روح الشاعر زين شعيب: ابو علي

يا أبجديه حروف للوزن احبكي
ما زال زين شعيب عا حالو تكي
رصّي شعر عا بحور من دمع الولاد
ووزن الفراهيدي عا تنهيده اتركي
الملكي يا "شرقيه" بيقلك بالحداد
الحرقه الو بالقلب والدمعه لكي
غط السكوت على شفاف السندباد
وقلو بعد ها اليوم ممنوع الحكي
ها الشاعر العمّر بيوت على المداد
بعصفة رياح الموت ودع مملكه
وهلـّي انعرف بالمجتمع متل الجماد
وقت اللي قالو (بو علي) هزّو الضمير
وركـّب بوجهو عيون تا يمّشي البكي

واقف عا طلعة اخ ونزول الوعي
وساعة زماني طلقت جد السعي
بلبنان زين شعيب راح ومش قليل
وهوني عيون الشعر غرقو بمدمعي
بالشعر كنا نجيب اخر مستحيل
ونخلق فجر ونقول للشمس اطلعي
وبشوارع الالهام ما نعوز الدليل
وعا كل راحة فكر كنا نندعي
وكلما بسدني نلتقي الله الوكيل
بنت المعنى نقلها شعر اسمعي
ولما قلت من بعد ما توفى الزميل
من هون بدّي ودعو ببيت القصيد
روحو اجت عالبال واشتركت معي

نحنا بدني بحكم الزوال مهدده
وطرقاتها باخ ويا دل معبده
عا القاعده منقول منعيش بأمان
والقاعده الالغام فيها قاعده
عا الارض جينا وما قبل فينا الزمان
وكلمة سعاده فصّلت الها الصدي
ومن هون بدنا نروح عا تاني مكان
تا نشلش على الارض منها وارده
لا تكـّبشو بعيشة هموم وارتهان
هوني الفنا وفوق الجمال السرمدي
قال الخلقنا والرسل قالوا كمان
عا الارض لما بينتهي دور الحياة
بيكون عمر الناس بلش يبتدي

الى روح الشاعر أنيس الفغالي

توفى انيس وخزق تيابو الوعي
ولبسو منابر شعرنا وراق النعي
وكبر العقل فصل عبايه من الخوات
وقال بمزاد العاطفه عليي اوقعي
هالشاعر العارو زمانو الالتفات
كان على درب المعرفه يجد السعي
وبنت المعنى كان بظروف الحياة
كلما التقاها يقلها الضعف اقلعي
وقت اللي قالو سيطر عليه الممات
وقال الجسد للروح بالجو اطلعي
من البيت هربت وانقطع خط الصلاة
وبعدو الحرف بيقول عا البيت ارجعي
الشاعر انيس محبتو من حب ذات
عا قلوب كل العارفينو بيندعي
كلما فقش بالفكر موج الذكريات
بشوفو عا شط البال عم يحكي معي

بالارتجالي كان عندو اجتهاد
عا كل جبهة شعر يفتح معركه
ولما العقارب وقفت بساعة جهاد
صار السكت مدماك قدام الحكي
و"شامات" قلعت لونها ولبست سواد
وقالو الاهالي يرحم تراب الذكي
وعنا بسدني ترحمو عليه العباد
ولما عرفت صارت حياتي مجعلكه
ناديت روحو وقلت من دمي المداد
وصعبه تا اقدر وصل الدمعه لكي
احترقت بعيني هلق وصارت رماد
لما فَقَست الآخ تا يدور البكي

يا بو رفيق المجد عيطلك رفيق
هجرت الدني تا تروح عا ارض البقا
وجاني الخبر متأخر وصارت حريق
سنين اللي كانت متل خمره معتقه
عند الخلقنا في إلك مطرح يليق
كل اللي اسمو مليح فيك بيلتقى
بوداعك الشعار من بحر الغميق
جابو درر تا يتوجو الكلمه بثقه
وفتحو بشعر الدمع اولادك طريق
وكلمن عا خدو صار عندو معلـّقه
والابجديه معصبه وام الرفيق
الصرخه برقبة كل دمعه معلقه

الشحرور قلك من بعد ما الراس شاب
عملتك وكيلي بالشعر هز الكره
وكلما الزمان بسيرتك يلبس تياب
بتغمز عيون الشعر عا الصار وجرى
الماضي الحلو عاش بضميرك والحباب
وما تغير الوضع بطقوس مغيّره
مين قال غيرك بعدما راح الشباب
"بمشي عا درب العمر وعيوني لورا"
لما النهايه عملتك جردة حساب
برحمة شبابي قلت يا اهل الورى
شمس المعنى غطست ببحر الغياب
تا يصير فيها يدق قلب المقبره

الى روح الشاعر عقل كرم

يا شاعر الكنا بعيونك عم نشوف
تا بكل ردة شعر يتجسّد وعي
قلك وجودك انت وحدك فيلسوف
ونهج البلاغه عا صدى صوتك وعي
وقت اللي قالو رحت من بين الصفوف
بدمعي قلت يا روح عا جسمو ارجعي
وجرّبت اكتب كلمتي بكيو الحروف
وقال الورق للحبر لا تحكي معي

بأيا قلب يا عقل ما عندك مكان
من الذاكره ممنوع اسمك ينمحي
انت بزماني ما كنت كنت الزمان
وغير على زندك ما ربي طفل الوحي
الله وكيلك كان قلبك اقحوان
وتلج العلى صنين منك يستحي
وكنا سوى للشعر عم نعمل كيان
وكان السهر عا مصالحك ومصالحي
وهلق رحت من هون عا بلاد الأمان
وبعدي انا عالارض قاعد مطرحي

شعر الزجل يا عقل بيعدك ملك
صوتك حلو ونكهة جناك معتـّقه
عرفتك صريح وكان صافي منهلك
وكانت جناحك عالنجوم محلقه
وبيت المعنى كان اسمو منزلك
وكلك وفا وفيك القلوب معلقه
عند الخلقنا فوق في فسحه إلك
والأبجديه قالت وقالو الجميع
بعدك عا صدر الشاعريه معلـّقه

وهلق بعد ما غاب عنا السندباد
بطوفة دمع منقول بالجو الحزين
يا آل كرم يا مي مع كل الولاد
انشالله فدا بيكون عنكم اجمعين

ما يرحم ترابو

شروقي

دقت وقالت تعا تا نوصل الاسلاك
بيتي عا طول المسا ما بينطرق بابو
الرجال عم يشتغل، بسهر انا وياك
منقدر نشيل الدني ونحط بغيابو

جاوبت مالي قلب ومشاكلي مدماك
عا البيت بلكي رجع تا يغير تيابو
قالت برب السما شو صايبك شو باك
مش رح بيرجع تعا "احلامنا شابو"

ولما لعندا وصلت قالت يا ما احلاك
وهجمت هجوم النمر عالمارق بغابو
وقالت "يا ملكي" الك رح سجل الاملاك
وهونيك صار الغزل يغزل عا دولابو

غنَّيت الها بعد ميتين بترجاك
وما عاد حس القلب بمرارة عذابو
وشلت بجنون القبل من دربها الاشواك
لما شفافي عا جمر شفافها دابو

وما لحقت منها سمعت لا تفتكر بنساك
الا وعلينا طبق هل يقبر شبابو
ولو ما اجاني ظرف اهرب من الشباك
كنت على تاني دني بضرب الجفت فلَّيت
وكان قال زوج المرا ما يرحم ترابو

عيدك يا امي

شروقي

امّي يا موج العطر يا قبلة الانظار
الله شلحلك ُقبل لمّي القبل لمّي
انتي صفاوة نغم متزوج الاوتار
خلقتي برحابة صدر تا تقدري تضّمي

بعيدك حروف الهجا طلبت من الاشعار
تنام على فرشة سحر وتقوم بمهمّه
تا يطوف فيها البحر عا نشرة الاخبار
وتشوف عين الزمن قديشك مهمّه

الوجدان جايب لكي ودمّه عليها بغار
منشان كلما التقو الوجدان والدمه
يقولو بقلب القلب انتي بكل نهار
وتغار امه اذا ما تغنجت امه

ما قبلت جبلك معي باقه من الازهار
زهرة شبابي جبت تاريحتي تشمّي
ومنشان تا تشمخي وانتي بقلب الدار
طالع عا راس الجبل تا جبلك القمّه

ما بحب قدم لكي الا شعر مختار
وبيطير عقلي اذا ايامك مغمّه
من بعد جمع وطرح عنك اخدت قرار
انتي بوقت المسا اسمك مسا الخيرات
وبالصبح انتي صباح الخير يا امّي

موت امرأة

 شروقي

التينه ورقها سقط "دافورها" بلونين
وكبوش متل الخلق ما شافت التوته
والخس قلبو انقطع واللوبيه من وين
وواقف خيال المرض عم يقطع تكوته

ووقفت عا باب الفرن وبايدها فرنكين
حرمه جبرها الفقر تا تجيب فتفوته
وهللي بيبيع الخبز متزنر بسلّين
من خطوط وجهو انعرف انسان حنتوتي

ولما ما عاد التقى البيبيعها بالدين
فاقت عا طفل احترق عا قرص بسكوته
وبالفكر قالت الو يا مفرّم السنين
وحياة رب السما قوتك قبل قوتي

وبالجوع منها انشلح نظره على الميلين
تا تشوف كسرة خبز عالارض مزتوته
ونزلت دموع القهر عا شكل مزرابين
وما كان يطلع حدا "بتفضلي فوتي"

مين قال حول الفرن طاير غراب البين
ومين قال رح يلتقى الغام موقوته
طلعو بقرب المرا هونيك قنبلتين
وطلعت الصرخه اهربي ولوين بدها تروح
البيكون الها انكتب عالدرب بتموتي

ممنوع التدخين

شروقي

الحلوة اللي صرلي سنه وشوي داريها
قالت تا يوم السبت عالبيت لاقيها
ولما بسرعه وصلت وتدوزنو الاوتار
غنَّيت الها، والي كترت اغانيها

وشعر المعنى كرج عا مطلع المشوار
وقت اللي قلت الدني بلا حب شوفيها
وطلعت قصيده بوزن يا باطل وستار
مع كل سحبة غزل غزلت قوافيها

ونحنا وبهاك الدني تلتين عقلي طار
جات الهموم الكنت بالسكت حاكيها
ما شفت الا "الشحن" وقف قبال الدار
والزوج صوبي ركض تا غراض يعطيها

من الخوف عنها بعدت شي ست سبع شبار
وقعدت متل الأنا مش عم بحاكيها
وطارت سيكارة "لوكي" من سحبتين كبار
ودمعة عيوني عرقت تا قدرت هدِّيها

وبلِّش يدق القلب وتبشلل الدبار
وروحي بروحي صرت هونيك وصيها
وفات الافندي وهجم هجمة بطل جبار
وقللي ببيتي انا عم امنع التدخين
هلي بايدك يا "ملكي" هلق اطفيها

هوني شهر تشرين

شروقي

باول غروب الشمس اخت القمر بالذات
دقِّت عابابي وكنت عم كيّل قناني
وبعد اليا اهلا ويا سهلا صارت البسمات
تعرض لأنو مسا الخيرات مسَّاني

ومن بعد سحبة حكي عالكَيْف واللذات
وشو قلت عنها لها وشو قالت فلانه
صارو عا باب القلب يتكومو اللهفات
ومعروف جوع النفس ما في الو ديانه

قرّبت ليها وقلت قلبي عليكي مات
فحّم يا دلّو وْقِلِب متل البزنجانه
مكتوب ما بتبعتي ولا بتبعتي سلامات
بالرغم انه انكتب بالدمع عنواني

نامي عازندي بهنا ما بدّك مخدّات
ولا حرام بدّك لأنو بيمغط لساني
بغنّي عتابا لكي وبكلّف الهيهات
عالعين يا بو الزلف تشقعلك غناني

وبالدار دار الغزل وعواصف الشهوات
تشرين اول لنا جابت مع التاني
وتموز طيّر ورق عا جوانح النسمات
البسَّكت قالت لنا (هوني شهر تشرين)
وحياة كل الهوا ما شفت بزماني

وجبات

عنتر أنا الايام لا تعدّو
سنيني عا وجه الارض بيمدو
عا دروب زرعت حالها مشاوير
بروح وبيقولو الرب لا يردو

وصاير غرامي شلعة حزازير
ولما سكوتي ما انعرف حدّو
صرت للساني درّج التقصير
وقلو المزح لا يخلط بجدو

وشعري العياري عن يمد كتير
بيوصل لخصري بدون ما شدّو
وحلم اللقا ما توفق بتفسير
بنزول ستو طالعه جدو

وتمي انلوق ومجعلك التفكير
بالشهر ساعه ونص عم سدو
وبنقفة عوينات كل زغير
بيصير قد مشاكلي قدو

ووجبة سناني بتقرش مسامير
والنيب عندي بيدبح بحدو
وحتى بهواكي سجل اساطير
للعقل وجبة ريش بدي جيب
تا يطير فيكي ساعة البدّو.

وجه المخده

سهران وحدي وقهوتي حدي
وايد الفجر عا الليل ممتدي
وفوق الورق لهفة قلم خيال
بترسم صور والفكر مسوده

وكلما كتبت رده عا راحة بال
تجن الظروف وتمحش الرده
وكلما بقرنه احشر الموال
يقللي ما عندي حروف بتقدي

ولما عليي تجمعو الاهوال
وصار الضجر من وصلتو قدي
حبيت افتح للقمار مجال
واكتب قصايد عا ورق شده

وطيّرت حالي والرياش قلال
عا بيت هل بتشد عا مشدي
ولما جناحي خيبّو الآمال
صرت بخيالي عالدرب هدي

ومن وصلتي قالو السهول جبال
مش رح تفيق بضربة مهده
وعن ها الحكي اعلنت استقلال
ودار الغزل بالمنطق الجدي

قالت دخيلك رتّب الاحوال
بدي قبل اشعار ما بدي
ووقت اللي صارت بالتخت تختال
قلت على وجهك نص كيلو كريم
بشلح قبل عا وجه المخده.

سفريات الكاس

ناست عيوني واهتمامك ناس
وشوقي لكي صاير بدون قياس
لعندي تعي بالليل يا نمره
بالعتم مش راح يقشعوكي الناس

بريدك تجي بلا بودره وحمره
تا ابتدي وتا ينتهي الوسواس
بيت المعنى ما الو نمره
قضامي الحجر وملبّس الاحساس

ما قدرت دوق بصحوتي تمره
وكلما انا اعمل ابو النواس
عم تطلع من تيابها الخمره
وتوصل لعندي بسفريات الكاس

وبالكفر كلما ينقصف عمرا
كلمة محبه بقطع الانفاس
وكلما الك صليت يا سمرا
بعلق خلاصي برقبة القداس

ها الكاينه مني تحت امرا
فيها زماني اعلن الافلاس
عيشي معي بجهنم الحمرا
من هون عا الجنه ما بدي روح
الجنه الما فيها ناس ما بتنداس.

قلت وقالت

بدي قالتلي كيف ما بدي
اعمل زنودك ها المسا مخده
قالو الي بتحب لحم حلال
وايدك على الحسنات منمدي

قلتلها ما بتاخدي استقلال
تا كل شدّه ترافق المدّه
ويصير يطلع صارخ الموال
وتعزف كمنجة خدّك لخدي

قالت انا مني ضلع منشال
من الصدر شقفة صدر منعدي
قلي شو عندك بالشعر رسمال
قلتلها بالمنطق الجدي

بشعر الغزل عندي قلم خيّال
وبالارتجالي ما حدا قدّي
وعند التحدي في الي اعمال
بتقدر بايد الذاكره تهدي

ومش بس عندي من الجمال حمال
صواريخ شعر على السما مودي
المريخ عاملي كذا تمثال
وصامد كلام الجوهري حدي

شاعر انا ليّي الشرف اختال
بساعة سكر ما بكسر الرده
عطيت الشعر حقو بكل مجال
وكلما شموخي اكتبو عا جبال
بعمل جبل صنين مسوده.

الرئيس الشهيد رينيه معوّض

قتلو الرئيس الحب يجمعنا
بعد القطيعه الما لها معنى
وقتلو رفاقو وطوفة الاحزان
جرفت دني والقهر شلعنا

معوض نظم للملتقى ديوان
ولما حروف القالها طبعنا
جات المنيّه من جهاز فلان
وجانا الخبر والعقل ضيعنا

بلبنان كنا كلنا اخوان
ومن ساعة العا بياض وقعنا
بعنا الكرامه بكمشة الرنان
وبالدم عدنا حقها دفعنا

اشكال شفنا من الشقا والوان
لما ما عدنا لبعضنا قنعنا
وببلاد كانت زينة البلدان
رقعة خلاف زغير وسعنا

تحت الارض صرنا لانو كان
وبعدو الحقد والشر مرجعنا
رح ياكلونا وياكلو لبنان
والصوم حاكم يوم مرفعنا

يا اهدن الفيكي الشرف عنوان
منقلك واوراقنا قطعنا
من جيبتو بيتعلم الانسان
وهيدا متل مجدو اخد معنا

وهلق بعدما استفرس العدوان
كرت العزيمه بلاش وزعنا
وقلنا الصلا عا حبة الزيوان
لما بصليبو القمح ركعنا

ويا رئيس  الجبلتك وجدان
"بصف الخلاص" رفعت اصبعنا
بالروح معنا ضل تالميزان
يرجح بعدما الحل ودعنا

زرعنا باسمك خالص الايمان
ومنشان نحصد متل ما زرعنا
الانجيل بدنا يعانق القرآن
واحمد وحنا يرجعو احباب
يصلو بكنيستنا وبجامعنا

انتهينا اليوم مطرح ما ابتدينا
بعدما استشهد العوّض علينا
لانو موقف ولاد الافاعي
خلى الحل يزمط من يدينا

ما بدنا نعود للقصف الجماعي
احترقنا بالقنابل وانقلينا
وما جانا من الفضا انسان واعي
تا نقدر عالارض نشحط جرينا

معوض قال جايي مد باعي
لكبح الشر لا تقولو انتهينا
بكل الشعب طالب اجتماعي
الدني طوفان لكن ما انطفينا

معوض للقطيع انعد راعي
وبنور محبتو نحنا انهدينا
ولأنو كان للايمان داعي
كانت قد هالكون الجريمه
وسواد الليل عا فراقو ارتدينا

يوسف بك كرم

"يوسف بك كرم" يا ناسيينو
البطوله مسجله بصفحة جبينو
واذا ما بتعرفو عنّو الحقيقه
فيكم تسألو التاريخ مينو

بطل جبار من عيله عريقه
كرامة موطنو دينو ويقينو
حكاية مجد بجروحو الغميقه
ولخبز اليوم متقرص عجينو

يا إهدن شبّقي جوانح طليقه
وطعمي الجو ريحة ياسمينو
لانو بتطلـّب الحاله الدقيقه
كرم تاني لظرف العايشينو

بوطننا شعّل المجرم حريقه
العطب لبنان مش معروف دينو
وعرقنا نازل بأسرع طريقه
وما عنا من "الكرم" مسحة جبينو

نحنا مرجع قلوب الرقيقه
والاخلاص فينا مدوبينو
محمد ما إنقتل عنا بطبيقه
ويسوع الناصري مش صالبينو

عنا بتشهد الموضه العتيقه
يمين التفرقه مش حالفينو
ما بدنا لا شقيق ولا شقيقه
بدنا حلم الله الناطرينو

الدمع والدم ما هز الخليقه
وآخر حل صارو مسرسبينو
واسرائيل عطيوها وثيقه
تفوت وتطلع وتزرع قنابل
بوطننا البعد الله عابدينو

أربعون الشاعر حنا عبيد

"حنون" راح وصارت الدمعه غدير
حقوقو بيوت الشعر منها وافيه
بنت المعنى بهمتو لبست حرير
والأبجديه عليه كانت لافيه

مش بس انو كان شاعرها القدير
فسّد عطش فكرو بمناهل صافيه
وما في حدا ما قال يا خي الامير
يعطيك الله كل همه وعافيه

انقلنا عظيم الشأن عنو مش كتير
كلمة عظيم الشأن منها كافيه
من جهتي للشعر عدّيتو عبير
 وشميّت عطرو بالوزن والقافيه

قلبو حمل اخلاص جواتو
والشعب قدّملو تحياتو
ومتل المزار اليوم قبرو صار
بينسى عليه الزايرو ذاتو

احباب "حنا" من البدايه كتار
وعا قلب قلبو كلهم فاتو
ومتريت بعرف حبها قنطار
هاتو ضيع عا شكلها هاتو
ومن ام يوسف شو انا محتار
ومن يوسف وشارلي ومن بناتو
حالي سألت وسألت باستمرار
كيف بيجو عا الاربعين نهار
وخمسين مره بغيبتو ماتو

عيد الاستقلال


زار الشاعر عصام ملكي مكتب مؤسسة الغربة الاعلامية وكم كانت فرحتنا عظيمة عندما أسمعنا هذه القصيدة الرائعة عن استقلال لبنان المفدى التاسع والستين.. فطلبنا منه تسجيلها بغية بثها عبر أثير راديو الغربة1.. وها نحن نهديها لقرائه:

قولو الابانا وبخّرو وصلـّو
حتى الوطن يسترجع محلو
ها العيد عيد التاسع وستين
بتنين والعشرين من تشرين
جيوش الغريبه من الوطن فلو

فرنسا بحاضرها وبماضيها
الشعب اهتمام كبير عاطيها
وبقلكم هلق بقل ودل
عن ارضنا راحت فرنسا وضل
لبناننا يشوف الدني فيها

العالم ما هيي من فرد طبقه
ومش كل عشبه اسمها حبقه
معناتها يا حباب يا اخوان
عنا دول بتروح من لبنان
وعنا دول بتروح وبتبقى

استقلال لبنان الكبير حلال
وقلال هلي بيفهمونا قلال
تا الموس ابلع بالعرض ما بريد
بالفكر كلما الذكريات نعيد
منشوف عنا عيد استقلال

مع جوقة خليل روكز

يا روح الشعر يا ورقة نصيبو
مسا الخيرات معكم عم تجيبو
الزجل عا خراجنا جايب صلاتو
وجروحو اليوم فيكم عم يطيبو
بو روكز ما قطع معنا صلاتو
عا سمعة جوقتو بيرش طيبو
وعا حيط البال كل معلقاتو
رفيقو اللون والمعنى قريبو
ومتل روكز وفي بالكون هاتو
عا درب الجلجله حامل صليبو
شاعر صارت الكلمه حماتو
تزوج زخمها مش من قريبو
وحبيب المقدره من ميزاتو
حبيبو المنبر وهوي حبيبو
وفيصل صايغ الشادي بذاتو
واسمو بالشعر صايغ بلاغه
الحروف لصرختو عم يستجيبو

ويا مستمعين ما فيكم تئنو
بها الحفله العظيمه سمعت انو
حرف القال لاحقني خريفي
ابن عشرين بيبين كأنو
هيدي جوقة الشعر الظريفه
اجو شعارها فيكم يجنو
اذا ما بيطلعو قد الوظيفه
لخليل على السما فيكم ترنو
خليل الراح عا الجنه خطيفه
قال على الشعر قانون سنو
وهنو الكلمتو متل القذيفه
وسجل انتصار بزغر سنو
ابو روكز ابو السمعه النظيفه
باسمو تاجرو كتار وبيعنو
هيدا تقمصو وهيدا خليفه
وروكز من زمان بعيد قلي
فيهم ما شفت قيراط منو

ويا شعري خلقة الألوان حلي
ومواهب قصّب والهام فلي
لطعمة تمك اشتاقو الليالي
بصراحه ما الك من هون فلي
اجت جوقة خليل وشفت حالي
بتلاته للشعر جابو التجلي
بلبنان الجنوبي والشمالي
تولو المنبر وقد التولي
خليل الكان رب الارتجالي
جمع منو زمان الشعر غله
رساله ما حمل كان الرساله
ولغيرو كان عا المنبر مظله
كلما ابحر بشوفو بخيالي
ومره من عدا ما سالت قلي
يا ملكي عا الشعر مشغول بالي
الفراغ بغيبتي بيضل حاضر
اذا ما روكز بياخد محلي

في احدى حفلات جوقة خليل روكز

يسعد مساكم جوكم هاني
الكم بقلب قلوبنا مكانه
لا تقاطعونا يرحم الأموات
ضلو إبر فوق الاسطوانه

رصو الصفوف وسحبو اللهفات
وخلو القدح يتزوج قناني
فحّم عطشنا وهلق الكاسات
عم تبصر بنامات مليانه

بها الحفلة الالها حنيني خوات
سكرو الحروف ودحرجو لساني
وصرت بخيالي عبّر الكلمات
وبكل شرودي بعروة زماني

الشاعر ببحر الشعر عا الموجات
بيرغي صور بيزوزق معاني
وكلما لذاتو يسكب من الذات
بتغار من ذاتو الدملجانه

ويا مطعمين سلامكم بوسات
القاصي بيقول وقالها الداني
البلبل بشعرو قاطع مسافات
وكيف السكت بيكون نساني

وحرب الابي ما غير العادات
بيقول الله لهون وداني
تا بكل جوله عطر النسمات
وطعمي عيون الشعر ألواني

وفيصل ابو الكلمه وابو الهمات
كفرو عا خشبة منبرو ديانه
للابجديه خيط علامات
تا يشوفها من الجهل عريانه

ويا روكز بقلك بلا غايات
بيتك بايد الحرف هداني
كلما عا قلبو اهتمامي فات
لمح البصر بيخرطشو غناني

كونك جبل للشعر بالدمات
بكتب عليك كتاب عنواني
روكز أصيل وقلبك الارزات
لبنان لبناني ما عملك انت
انت عملت لبنان لبناني.

على نبع الصفا مع جوقة خليل روكز

تفرّج يا نبع الصفا ها الناس منهم ناس
من عند الله اجو بظروف شفافه
نزلو بقفة هوا والضو لما ناس
مشّو شعاع القمر قدامهم حافي

لبنان فيهم لقى فرحه ما الها قياس
وقلن شو بدكم خدو ويعطكيم عوافي
وساعة ما شاف الحلا اربع خمس اجناس
علق وسام القطر عا صدر الكنافه

لبنان جنة عدن وحجارتو بتنباس
وان قلت مضرب متل بيكون مش كافي
الجنه الما فيها بشر بالفعل ما بتنداس
لهونيك لا ترجعو من ارض مضيافه

بالشعر جبنا الوحي وللنصر جبنا قواس
ووقت اللي قال الحرف عم يعرضو كتافي
منو لحالو الوزن عا الصخر صب اساس
وشبرق شبابو وطلب ايدين القوافي

يا موزعين اللطف والذوق والاحساس
بيقول نبع الصفا بالمنطق الدافي
بدكم تصيرو الخمر ونصير نحنا الكاس
وهوني بيروح الخمر بالكاس عا الصافي.

بساعة مأتمك

بمناسبة الاحتفال بتمثال الشاعر الراحل خليل روكز:

يا بو روكز اذا منا بدا لك
نقص لا تلومنا عرفنا الخطيّه
تا حتى يكون تمثالك بدالك
ضروري ينعمل بالأبجديه

بموتك منطفي بيت المعنى
ما ضل بخلقتو شبّاك راكب
وخطو بالغزل مقطوع عنا
كأنو تسجل لغزل العناكب

ولما عالشعر شرّف "حديثو"
قلنا: قلبت الايام هلق
بعد ما تفلسف وطوّل حديثو
ضمير الشعر عا غيابك تخلق

بصراحه وحق حلم الشاعريه
بساعة مأتمك بالروح كنا
ويا ما حملت النسمه الطريّه
العا قبرك مرقت سلامات منا

أنا وعا أرض اكلتها المسافه
قبل ما يخبروني عرفت انو
اذا بتمثالك احتكو القوافي
بدها تطلع الآخات منو.
(ليس المقصود كل الشعر الحديث بل بعضه الخالي من الشاعرية)

في أربعين الشاعر نعيم خوري

لا تسألوني عن أنا، عارف أنا
بدمعة عيون الشعر ضيّعت الصّواب
ما ضلّ راس من القوافي ما انحنى
وما ضل بيت وما فتـّح للهم باب
بالجو شبّق جانحو ونال المنى
وبكر الوحي عن قمّة المريخ جاب
ولما رحيلو هزّ مدماك الجنى
عالأبجديه حط إيدو الانتداب
وحرف اللي كان بمنطقو يلبس هنا
صار بسكوتو يبصر بنام التياب.

يا نعيم، الدمع عالآخ ارتمى
ولبسو البلابل طلة المالك حزين
بكل القلوب الطيبه حبك نما
وما كنت تفرق بين دين وبين دين
صاحب عقيده ساميه وقدرك سما
انشالله فدا بتكون عنا أجمعين
بشعر المقفى كنت جبّار ويا ما
مفجّر قنابل عالشمال وعاليمين
منك زمانك كان يفهم بالوما
ونهج البلاغه كان يعرف إنت مين
بلسان نحنا قلت: مرجع منسمى
وجايي تا كفي كلمتي بالأربعين

"بطـّرام" قالت: يا دني الحرقه ابعدي
وصرخة "يا دلي كيف راح" بصرختين
شلحت عا سوء الحظ نظره مجلده
وقالت: نعيم وبسّ عنا مش تنين
وبكيو الأهالي عليك، والحاضر بدي
يستفقدك عا كل وقفة عين زين
ونحنا بني الشعار مش رح ننعدي
راحة فكر تا نصير نغزي الفرقدين
كل البشر بتموت موته واحده
ومنموت نحنا بالدقيقه مرتين.

رحيل الشاعر نعيم خوري

ودّع نعيم وراح عا دنيا الخلود
راح اللي إلنا كنا مرجع يعتبر
وطار الصواب وصارت الايام سود
لما عا ضهر المبتدا جانا الخبر
وصار القدر بيناتنا يرسم حدود
لما الدوا ما عاد ينفع والإبر
وشعرو اللي كان بريشتو يرسم وجود
هاجت بحورو وصارت تموّج عبر

كان الصديق المخلص ومشعال كان
وبكل شهقة كاس صبّيتو عرق
قلي: خريفي ما بقا عندو كيان
التحسين ماشي مش رح يهرّ الورق
وهلق بعدما سافر لأبعد مكان
بجمعه عظيمه وبعدما قلبي احترق
مرقت على فتحة سيرتو شفت الزمان
عم يكتب على الكون: من هوني مرق

لا شك إنو الموت ما بيرحم حدا
الانسان عا الأوهام مملكتو بني
وقال المتل ولكلمتو طالع صدى:
بولادتو الانسان عا حالو جني
بهجرة نعيم الهمّ عالقلب اهتدى
وعم تطلع الآخات من باني وبني
خلو الدني بالصف توقف عالهدا
تا تمرق الايام وتعزّي الدني

مات البشعرو منبر الكلمه بنى
ولبست خيوط الشمس حله معتّمه
وطفرت حياة الناس والموت اغتنى
وتعلمو العينين درس المحرمه
هالشاعر اللي ضحكتو كانت هنا
وبصمة وجودو عالوجود معلمه
ما قدرت احكي بمأتمو وإسأل أنا:
مين العابكرا رح بيحكي بمأتمي؟

بدنا سنه بلا راس

بدنا السلام يعم موطننا
وما يضل عنا وضع يحزننا
وبدنا ظروف تودع الافلاس
وبدنا ما يبقى الجن ساكنا

وبدنا محبه صادقه واحساس
وبدنا بايدو الحق يعجننا
وبدنا لشمخة مستوانا اساس
وعا الرمل ما نبني مساكنا

وبدنا علينا يخيّم الايناس
وبالمجتمع نحفظ اماكنا
وبدنا حضور يدق كاس بكاس
وبدنا تا نرجع متل ما كنا

وبدنا اللي النا عم يدقو جراس
دقة قلب ما ياخدو منا
وبدنا فرح بالمتر ما بينقاس
وبدنا سنه ما يكون الها راس
تا نحط الها راس من عنا

دمعتي وقيّه

مبارح رحت عا المقبره بهمه
تا زور ستي الفاضله وامي
وزن الحكي ما قدرت اعرف كيف
الكلمات صارو ينزلو شقاقيف
بدقيقه الفيها فتحت تمي

صار الوجع للراس عرقيّه
وهمّي بلاد ودمعتي وقيّه
امي لها بالفعل مقبرتين
وحده "بركوود" ظاهره للعين
طول الوقت والتانيه فيي

امي بحوش فكارنا فله
قلنا لها بالدمع لا تفلي
بغيابها صارو عيوني قزاز
كل يوم عندي بالفكر جناز
وبكل ساعه آخ يا دلي

اللي بيعرفوني بيعرفو اني
بغيابها ببكي دمع بني
مش بس صاير من انا ممقوت
ميتين مره بالنهار بموت
وعا الاخره راحت قبل مني

مين اللي بدو يعيش للميه

يا الف ريت ظروفنا لبقه !
بضعف العزيمه النفس منسبقه
نجوم الضهر منشوف يوميّه
وفاتت عا قلب قلوبنا العبقه

عنا مشاكل شبه عاديه
ومعلوم منا من فرد طبقه
بدنا ربح ما يكون منيه
وبدنا شي شنّ يوافق الطبقه

عا الكون جينا بربع عقليه
وما منعرف الشوكه من الحبقه
وحوا بتجي بأنفاس عطريه
ومنقول ما منعلق على الدبقه

عم نلتقي بايام مش هيي
وعين العنايه نص منطبقه
مين اللي بدو يعيش للميه
بالموت لنو منفتكر شي يوم
ومنشوف عا مين العتب واللوم
منقول بكرا رح يطول النوم
لازم اوادم بالدني نبقى

الشيطان لبناني

حب الوطن ما في الو تاني
هيكي قلت بتدحرج لساني
وحبي عباده بالفعل محسوب
وصارو غمر وشوي احزاني
 
ما قدرت لاقي بالحياة قلوب
تشهق الي عا دروب وجداني
وكلما شفافي تجسّدو المشروب
بيمشي الفراغ بقلب القناني
 
حظي ما قشّر من صبر ايوب
وكيف الفرح بيكون نسّاني
ما قدرت لاقي للفرح اسلوب
وما ساعد القاصي ولا الداني
 
رح دوب من كتر القهر رح دوب
بيجوز منو بها الدني زماني
مش بس عا امري صرت مغلوب
صارت علي دمعتي عيانه
 
الايام سودا والفكر متعوب
ومني خبر لليوم ما جاني
لا تلومني يا موطني المحبوب
عم كيّل مسبّات للشيطان
ومش عارف الشيطان لبناني