الصفحات

ننشر في هذا الموقع أشعار الشاعر الكبير عصام ملكي

الى روح الصديق المرحوم حنا شحاده

شو ها المصيبه العيد بالآخ انوصل
ودابو قلوب الاهل والمشهد اليم
وصار الدمع عا خدودهم ينزل خصل
بمأتم رجل ما كان الا مستقيم
حنا شحاده "قال" عن روحو انفصل
يا حاملين النعش بحياة العظيم
شيلو الغطا عنو تا نعرف شو حصل
منها بعيده يكون غلطان الحكيم

قبرك يا حنا بالدني بيبقى مزار
عرّاب بنتي وحاضر بتبقى معي
ما كان طقسي وطقسك يشوف الغيار
اخوان كنا وحبنا جد السعي
بقول بوداعك كلمتين باختصار
وحق الصداقة هون ... مش عم ادعي
نشرت القصيده بالشمس طول النهار
تا ينشفو سطور اللي تشّو بأدمعي

مرجع صداقه كل عمرك منسما
ولكل زيد وعمر بتقدم دمك
ومعروف انك كنت تفهم بالوما
ونحنا جماعه بالحياة منفهمك
قدرك يا "بو جونسون" بها الدنيا سما
وما في حدا الا بقلبو كرّمك
معمد برحمة ربنا وعطف السما
ما في لزوم نقول الله يرحمك

يا ما حضورك بيننا سجّل فتوح
بقدّم تعازي لعيلتك ولموطني
بيضل اسمك صاحب الوجه الصبوح
وبلسان نحنا ما لنا عنك غني
غيابك "يا حنا" بالقلب تارك جروح
وجايي انا قدّام نعشك انحني
من هون رحت وما قلت بدّك تروح
معليش بكرا بشوفك بتاني دني

الله يعين

بعيد ... الابانا وبريت الشفـّه
ومش عم بيوصل عا السما صفـّي
دقت البلا وطعميت "بشمزين"
عن بو جنب شو كنت عم لفـّي

هلق عليي عامل قوانين
كاسي مع الكنفوش ما بقفـّي
وبقول الله دخل اسمو يعين
تا صير اعرف وين رح صفـّي

رح ينقطع قلبي بقلة دين
للهم منها الروح مشتفـّه
من مي كل بضاعتي ومن طين
ما بقيت القى صرت عا الحفـّه

منـّو ضروري ساير شياطين
ما زال بلـّش ينقرا كفـّي
قرّبت عا الطلعه من السبعين
المنـّو خواجا يضل عني بعيد
عندي وجع بالراس بيكفـّي

فرد الله

الجو انجوى والناس عالمكشوف
عم يشلحو الصابون والليفه
والكفر ماشي والظروف سيوف
بتدبح قلوب مهفهفه نضيفه

بكيف الدفع بالمعبد المعروف
لا شك انو معلقه كيفي
يا خاتم على بياض دس وشوف
قديش عم يتلون الانسان

بالمجتمع تا يحفظ وظيفه
ما في نجم بالعتم يضوي عليك
ونص القمر ما بيطلع بيدو
اكبر جريمه تنربط ايديك

صوب السما مفروض ينمدّو
هلي بيقلك هيك صلي وهيك
قلو لا يخلط جمعتو بحدّو
هيدا بطل تمثيل وينك ليك

رب السما تمثيل ما بدّو
هلي علينا كتـّرو التدخين
يحلو بقا من دربنا يلله
مين العطاهم اهتمامو مين

وسعر السكت كرمالهم غلا
للناس حاجي يفصللو قوانين
يخلو الصلا عالصوم يتصلى
حاجي بقا "هالدين احسن دين"

ما زال عم نعبد فرد الله
بالوهم حاجي يعقلو المجنون
وقديس هون وهون قديسه
القديس هلي ربنا بلا دهون

سكبو قطر عا صدر الهريسه
لا تكون الا لخالقك مديون
صلي الو "الشهوات تلبيسه"
ربك بيشوفك وين ما بتكون
ما بيلزمك جامع ولا كنيسه

حرقتي شيلي

دخلك عا وزن الحب مدّيلي
سفرة امل وشفافك ارغيلي
الكاس على قولو بالسكر مليان
وصارت ليالي النار دلليله

حرف الهجا من كلمتي هربان
وبحر الشعر نشّف بتحليلي
بسكتي اذا غنيتك بها الان
بخسر انا. وما بتربحي جميلي

حبيت سوكر كيف حبي كان
ما لقيت ذكرى بنفس اركيله
عالحيط بدّي وقـّف النسيان
وخلي القصاص يحفظو متيله

لا تصوّريلي الدرب والعنوان
خلي الجسد باللمس يحكيلي
وحياتك بساعة شقا الانسان
كلمة يا اهلا بتطلع تقيله

بدّي حياة مشبّعة الوان
فوتي عا قلبي وحرقتي شيلي
لكن اذا بتفضلي الغليان
بيناتنا يبقى تا تبقى الآخ
اعطيني من الآخات تشكيله

ساعة دوام

بالارض عيني وللنظر طالع شلوش
وقرش الامل بالملتقى فيكي انصرف
ومطرح ما كان الجو صرخة مردكوش
مات الصدى والصوت ما عاد انعرف

غيابك هدمني والقهر عمّر خوات
عا جروح قلبي دخل موتاكي الهتي
حبك لأنو من صميم الحب ذات
بدمعة عيوني تفصلو تياب الشتي

بشلحة نظر حبيت بقبش عا الطريق
تا شوف كنو منك بلاقي حدا
ولما لقيت الحل بنبيد العتيق
قدحت الظروف وصرت دخن عالهدا

يا موقفي الساعات بصفوف الكلام
ما قدرت ابعت صوبك "لعندي تعي"
طالع عبالي اشتري ساعة دوام
ووين ما رحت بالحب اخدها معي

وهلـّق بقلك بعدما خيالك عصا
امر المحبه والصبر خلف ضجر
انتي حجر ما بسحب عليكي عصا
من زغرتي لليوم مش ضارب حجر

هديتك عالعيد

شفتك بحلمي عالقه التنهيد
وشفت العذاب مكوّم قبالي
الخردق نظر وعيونك بواريد
وطالع مع الاخات موالي

ومنشان ما يضل المجال بعيد
ومنشان يتصرف شغل بالي
سفـّرت عني الضعف والترديد
تا تعيطيلي انت رجالي

ومن بعدما حطـّيت ايد بايد
وتفاهم خيالك مع خيالي
رجعتي عا نغمة إيدك وما بريد
وصارت يميني تقاتل شمالي

ولما لقيت الشوق عم بيزيد
وخف الضغط من صوتك العالي
ناولتك من الحب صحن جديد
تا سمعت كلمه هيك احلالي

وكل الوعود عملتها زواويد
منشان ينشف دمعك الغالي
ولما طلبتي هديتك عالعيد
لفيت حالي بحالك وبالحال
بحالك لحالك قدمت حالي

الى روح الخوري حنا لحود

والله يا بونا الهم خزقني ومشي
دابت عيوني وللارض راسي انحنى
لا شك انو هالدني صارت ما شي
عند البيحبك قد ما بحبك انا

من هون روحك راحت وجو الاليم
خيّم علينا والوجع فينا قطن
بعزّي شبابك والبنات من الصميم
وعيالهم بالمهجر وارض الوطن

يا بو قلب من لون زهر الاقحوان
فصل القرابه البيننا رح اشرحو
بيي اللي راح من الدني بهاك الزمان
صرلك شي عشر سنين آخد مطرحو

اليوم الجسد قدام ها الشعب الجريح
عا المقبره رايح بلحظه وتانيه
العيله بدموع مطرطشه الجو الفسيح
وقال الوعي تقبر حياة الفانيه

ونحنا بظل المشهد وموقف صريح
حول النعش قلنا بروس الحانيه
يا جمعة الآلام مش رح نستريح
تا يرجع الماضي بمواقف بانيه
بثالث نهار من القبر قام المسيح
ويوم الاحد بدنا عجيبه تانيه

حلم هربان

ناس الوعي وهلق يا بنت الناس
مفصّل تياب الهم عا قياسي
من بعد ما ختير بايدي الكاس
جيتي بنغمة كاسك وكاسي

نظمتك قصيده صيتها مشهور
ولما التقو الاوزان بقوافي
ضيّعت كلمة مرحبا وبونجور
بين الحكي العلقان بشفافي

وقلت لعذابي فّل صاح الديك
خدها معك وعواطفي توقـّى
وبعدك بقلبي واقفي هونيك
مطرح ما بدها توقف الدقه

شحّو عيوني والعتم بيسّم
ولما عرفت صوب العما إني
نخيّت عا نص الدرب تا لم
كمشة نظر وقعتها مني

شاحط ورايي والحلم هربان
وهمّي ما كانت حالتي تهمو
الانسان "وحياتك انا" الانسان
ضحكه شلحها الكون من تمو

ضيّعت حالي بصرخة الآلام
لما عليي خلفها سكر
وكاتب عا غبرة آخر الايام
اني "انا" ما بقيت اتذكر