الصفحات

ننشر في هذا الموقع أشعار الشاعر الكبير عصام ملكي

ربيع شباب وعشاب

الربيع بطلتو هزّ البريه
ودقن الارض طلعها عبيه
وبدل ما يكون فيها شعر شايب
طلع فيها نصيب المزهريه

وعطر اللي الو كم شهر غايب
تا يقدر بالفضا ياخد هويه
لزّق عا الهوا وقلو قرايب
انا وانتي دخيلك طير فيي

ومواسم كسدره قطفو الحبايب
بعدما صارت الشهوه قويه
ونور الشمس عا الطرقات دايب
متل ما بدوب عا شفاف الصبيه

وشال النحل من دربو المصايب
تا يدلق شهد بجران الخليه
والعصفور قش وريش جايب
تا يبني عش يخدملو القضيه

لربيع الكون منو الموت عايب
بيرجع عا الدني بعد المنيه
يورق يزهر ويعمل عجايب
وربيع شبابنا ان راح منا
املنا برجعتو صفر على ميه

بدي شي كاس

دلق الحراره نازله عليّي
وناشف نهاري وقالب مويي
الصقعه قليله والعرق مزراب
وخيط الشمس حوصر بشقّ الباب
وتا يروح قتلت حالها الفيّه

وبالشجرة الفيها عمل عيدو
بو الحن وانفلشت زواويدو
هونيك شفت بخرم شغل البال
عصفور ناسي عالغصن موّال
وساعة رجوعو واقفه بإيدو

ونجاصة اللي بحبّها معلق
الشحرور منها بعدما حلق
قال الهوا لوراقها الحلوين
مش رح تطيرو تا يجي تشرين
جلابيط إنتو بعدكم هلـّق

وهونيك إنتي بمقلب التاني
بشمّة هوا عالدبق علقاني
وهوني أنا عا شفتي موال
بدّي شي كاس يكون فاضي الباب
ينشف حديثو ريق القناني

بيتك بنوّار

إجا نوّار عا دعسة خبارو
وجمال اليوسفي داير مدارو
وفرش عالأرض حلـّه سندسيّه
بعراوي وجودها بكل زرارو

الجبال تلوّنو بريشه خفيّه
ورواق الطقس وجنونو تبارو
وسهول الختيرت رجعت صبيّه
الهوا بخراجها غندر مسارو

ومشي التفكير بالصوره النقيّه
العا بيدر لونها بيجمع غمارو
وعطى الإلهام إبرة جاذبيّه
تا فيها يعبّر الواقع قرارو

وغط الطير بالشجره الفتيّه
تا يسأل عالمواسم: وين صارو؟
لقى الأغصان عم تحمل هويّه
بعد ما الهمّ غلّ بانتظارو

ولما الأوف وعّى الابجديه
الوزن بالقافيه استفقد عيارو
وعا سفرة شعر جات القابليّه
ولأنو بيتك براس القصيده
وقفت عالحرف تا ساير حجارو

حظي فركها

عا الحيط صامد رسمك ورسمي
بيتسايرو أوقات عا الرسمي
لو كان بدها تروح مني الروح
لعندك أنا بهالشوب مش رح روح
ما زال هوني مقيّله النسمه

بدّي بسكوتي فهمك إنو
صارو جروحي من الهوى يئنو
لا تسألي: ضغط الحراره كيف؟
بها النار جسمي صاير شقاقيف
وشايل عرق ما بينشرب منو

من الأرض قربت ساعة حلاشي
حظي فركها ونسّل قماشي
من كتر ما فيّي عذابي اهتم
كنت بقعودي مع انا انسّم
هلق صرت إنسم عالماشي

صوتي قطعني صدقي كلامي
ما بقيت إقدر إحفظ أسامي
وما ضلّ عندي للكتابه حروف
مستقبلي بهالكون مش عم شوف
خلقة ورا بتضل قدّامي

موت لبنان

شروقي

عصفت رياح الشقا وكبو الغيوم جرار
والعدل قالو البشر ما بيعرفو مينو
ضايع بصرخة دني وما في الو دبّار
وبالجو صدرو نفخ كاسر قوانينو

لا الخي بعدو وفي ولا الجار بعدو جار
وبكيّر صار الحسد يفتح دكاكينو
وصارت ظروف السكت تسعل بحص وحجار
واصفّر وجه الحكي ونشفت شرايينو

لبنان موتو اجا ببشارة البشار
بيغلي تياب المدى تا تكمش سنينو
ومات الكيان الحلو عا ذمة الاخبار
وما عاد شم الهوا ريحة عناوينو

قالو ضياع الوقت جايب معو اعذار
وقالو ربيع الامل زهّرت بساتينو
بتم العراوي اجا يحط الجمال زرار
تا تصير تفقس عطر يعجب محبينو

وعا الضيم قالو اصبرو عزم الفساد انهار
ومش عم يقولو لنا الاجحاد مندينو
بالعتم حبله الدني ومش رح تجيب نهار
يضحك بعبو وطن عم يحترق دينو

لحقني الموت

البيموت لازم يكتب وصيّه
انو انتهى ميه على ميه
بيكون جسمو نشّف من الزيت
وما في الو عالارض يدّييه

ومره السخونه بالهوا شمّيت
بظروف ما بتنعد عاديه
فزعت على حالي وعشرتي عدّيت
وقلت النهايه هون هي هيي

سمعت الفدائي عم يعمّر بيت
بقرص السما ولوازمو هديه
لكن ما خدت على الحكي ولا عطيت
تا بقبش بصوره طبيعيه

ودّيت صوت على السما وما لقيت
مين البيرد بكل حريه
ونمت وبنومي قبل ما تهنيت
شوفو شو صار بوقتها فيي

بحلمي لحقني الموت وتواريت
تحت التراب وصرت خبريه
ولما بروحي عا السما عليت
عا مفرق الجنه شفت عامود
وبالصف ما كانو الفدائيي

مش مرجله

جهادي وواجبك بالبيت هامل
بقصيدة شعر منك بحر كامل
ما فيي اوقف بجنبك ما فيي
تا حتى تغير المنهاج آمل

اذا للمعركه زنودك قويه
اعطينا عن حروبك وصف شامل
بقتل الابريا بتعمل خطيه
اذا عا سلاحك تمشّو الانامل

ولأنك صرت ناوي عا البليه
وقنابل حامل وخرطوش حامل
ما عندك فرق ختيار وصبيه
المهم تكون خطه لجرم عامل

مبارح عن حماس وعنجهيه
قتلت خمسين جوات المعامل
وكانو ابريا ميه عا ميه
ومنهم في خمس نسوان حامل

وراك طفال يا صاحب قضيه
الطفالى وواجبك مش عم تجامل
لحب الذات عامل افضليه
بدك بالسما ميتين حرمه
وأبو أم اليتامى والارامل.

الجنة فاضيه

يا شرق شعبك ضايع بقلب الكره
لقدام فشخه فز وتنين لورا
عندو عيون مفتحه لكن ضرير
ان دق بحجر بيقول دق بجوهره

في ناس ربيو عا الوهم عقلن زغير
انوعدو بدني فيها طقوس مغيره
وشيخ بحريم بيوعد وتاني خبير
بأمر السما وما بيستحو من الزعبره

وهيدا جهادو مع حماسو بيستشير
وهيدا كرامة سيّدو الموت اشترى
وهيدا قنابل حامل ودق النفير
رايح عا جنه والشهاده تذكره

الاعمار النا عطية الرب القدير
بياخد بيعطي والقضيه مسوكره
اللي بينتحر بيكون كافر بالمصير
وكافر برب الكون والصار وجرى

يا فدائي وطالب الحظ الوفير
من بعد موتك مين قلك يا ترى؟
بتتزوج الميات وبتصبح امير
الجنه من النسوان فضيت من زمان
اكتر من الرجّال عم تخطى المرا.

شحرور الوادي: اسعد الخوري الفغالي

1894-1937

لزجلنا اسعد الخوري بدايه
شلح عا المنبر عيون العنايه
ودلق عا الابجديه حب ذاتو
تا مجد الشعر ما يعرف نهايه

الوحي الخلاق عارو التفاتو
وانا عا محبتو نسّم هوايي
من "بدادون" الفغالي هباتو
فرّق عا الدني بحرف القرايه

الوزن والقافيه حكيو بصفاتو
ما خلى حبر يقعد بالدوايه
لجمال الشعر قدّم واجباتو
لزمانو كان اسطوره وروايه

متلو عا الارض منقول هاتو
تا حتى نسّلمو عرش الولايه
جيت على الدني بساعة مماتو
قللي عا السما ما بحب اطلع
اذا ما شفتك على الارض جايي

كرمال شبر تراب


يقول الشاعر المرحوم ايليا ابو شديد في ديوانه
"خيمة عنكبوت"

"مين البيعرف هالدني أسرارها؟
يمكن فضائل غيرها تكون العيوب
ويمكن صلاة شيوخها وأبرارها
تكون بعصر تاني الخطايا والذنوب
شو هالدني أبطالها وثوّارها؟
كرمال شقفة أرض بيقيمو الحروب
بيتقاتلو عا متر من امتارها
وعا متر من أمتارها بيفنو الشعوب
ويا ما شعوب تسابقو وتسلحو
وتقاتلو وتعاركو وتدبّحو
وكرمال متر الارض خسرو هالدني
وراحو ومتر الارض باقي بمطرحو"...

وأنا أقول:
هدو عصبكم لا بقا تجنـّو
ولكل شبر تراب لا تحنو
بالمعركه ما بتربحو مسافات
السلم اطلبو قوانين لا تسنو
يا ولاد يا ستّات يا خواجات
البيقلكم روحو اقتلو مفروض
 ما تقاربوه وتزعلو منو

بالحال نحنا منطلب سكوتو
البيقلكم: عالمعركه فوتو
عا الجار ما بيقشع قساوة جار
شعب البيهمّو يسفر زيوتو
بغير التفاهم ما التقى دبّار
مع هل بلع يونان مع حوتو
من الموت لازم يفزعو الشعّار
منهم كلام الجوهري وقوتو
الشاعر إلو روحين نور ونار
وبالمجتمع منعّد إنسانين
 وقت البيموت تنين بيموتو

جزر الحياة مكبّش بمدو
فوق الارض إيامنا انعدو
الباعو الضمير تصيّدو الأطفال
وعا طلعة الآخات ما ردو
الله دخيلو ضلع آدم شال
وحوا خلق نحنا شغل يدّو
ساعة ما بدو بيقلب الأحوال
بحل المشاكل ما حدا قدّو
بدونو ما فينا نصرّف الاعمال
ولا نواجه العا حقوقنا تعدّو
لا شك هوّي شايف الأهوال
ان كان بدّو المشكله تنحل
بيحلها "بيجوز ما بدّو"

بقبشي عليّي

هوني انا بالشمس والفيّه
دقـّات قلبي حامل بديي
بين البعد والقبل والهلق
وما بين لا مزوّج ولا مطلق
كرمال الله بقبشي عليي

لما بحالو ضاع إيماني
شلحت الكلام بخلقة زماني
وصرت بسكوتي سفرو مسافات
و"يلعن أبو" خلـّيت للحزات
تا يضل فيها يدحرج لساني

سكران بعفارة حواليّي
وعم يكمشو بصابيص عينيي
قدّام خلفي شاحط التفكير
ودربي حجاره مطعّمه مسامير
وطالع إلي وتـّاب بجريّي

لعندي شبابي ما بقا يعدّي
صرت بلا نيره ووجبتي حدّي
بغنـّي لحالي بكرسة الهزّاز
وعامل بيوت الميجانا من قزاز
تا ضلّ إكسر قد ما بدّي

انخزقت قميص الليل

قالت: لا تطرق درب مطروقه
رح انطرك هونيك خلف الحيط
وكانت قميص الليل مخزوقه
وبالبقبشه ما لقيت ابره وخيط

فزعان كنت العين تقشعنا
بظلمه ما فيها تفشكل العميان
كان القمر زابط عا موقعنا
والضو ماشي عا العتم حفيان

قلتلها: ما لقيت عا كسما
وصارت بغنجه تقترب ليّي
ولما درست جغرافية جسما
بصابيع ديّي قلت: يا بيّي!

ولما الصباح حدودنا تخطى
شفنا الدني بتركيبها عالريق
النفناف آخد عالزهر غطـّه
ونور الشمس بينكوزو تا يفيق

ولرجوعنا لما لقينا زمان
كانو النجوم بوقتها فلو
ومطرح ما كنا والتفاهم كان
بحضن الفضا خيالاتنا ضلو

لا مزوّج ولا مطلـّق

هلي قريبه كتير وبعيده
قالت: ما فيها تعيّد بعيدي
كل شي وخيالي بجوّها معلـّق
ما بصافحو الا بقفا إيدي

وما بين لا مزوّج ولا مطلـّق
آخر انا وعا الآخ تنهيده
وكلما عا بيت الشعر اتخلق
بكسر عا راس الحرف قرميده

بنومي انا وعم غط بتقلق
وكل يوم عندي مشكله جديده
قدّيش بدّي ضل إتملـّق
وغصّ بدخيلك ايش بتريدي؟

يمكن نهاية هالدني هلـّق
وعم تنمحي صفحة مواعيدي
لساني بكلمة مرحبا علـّق
وقلـّي زماني: بخاطرك سيدي

ولمـّا قزم "شو بدّها"؟ تعملق
وتمشور الدمع بتجاعيدي
خلفي الدني قلتلها مشملق
بالحب كنو رح تضلي هيك
عالذاكره المشوار لا تعيدي