شروقي
الله وكيلك الك ماضي وجودي صكوك
وكلما غلقتي الحكي عم افتح السيره
عندك بحكم الهوى صار الملك مملوك
وهيدا اللي صاير معك بحساب تقديري
بابك طرقتو بحما شهادات حسن سلوك
ومعروف انو معي ما عاشت الغيره
وبالهمس قلتي الي يسلم ابو الربوك
وصرت على يسلم ابو دوزن مشاويري
شعر النظمتو لكي بعواطفي محبوك
غط على ذوق السمع تا بجانحو تطيري
وقلبي وهبتو لكي وهلق الك متروك
تسهيل امري قبل ما يزيد تعتيري
لعندك بروح وبجي وتعلم المكوك
مني دروس المشي وبتشهد الجيره
ودخان همي طلع مني بشكل مسموك
وشنكل عا نص الدرب دخنة سواكيري
حبك يقيني هدم والراس عبّى شكوك
وكلما جمعنا الزمن عم اوقع بحيره
عا الكاس قلتي الي كل الجسد مبروك
وما في مساحة لمس عم تطلع كبيره
شروقي
الانسان لعبة ورق عا محورو بيدور
والموت خلف العمر فالت اواشيشو
ومنوين بدو الربح يفتح الو معبور
ما زال جبرو القدر يحمل خرافيشو
عا الكون لما اجا برفقة صباح النور
حسّب بانو الابد بيكون بخشيشو
ولما سنينو التحو وبيّن عليه كسور
هوّي وحياتو انعزم عا نهار تحويشو
لكن يا حلوه انا بالوهم مش مأسور
عمري بسحبة مدى رح يلعب بفيشو
عندي ببحر الشعر ما بيغرق البابور
وبيضل عندي غزل ياكل مناقيشو
حابب عا شلح النظر عمّر خيم وقصور
وخلي عليكي العصر يشلح طراطيشو
وبالريش خلص اذا كان الامر ميسور
ولو كان ما في حدا بيخلص بريشو
ولما النهايه بتجي بلا حاضر ودستور
وجسمي بكمشة صلا بيروح عابيشو
بطلع عا وجه الارض من بعد تسع شهور
وبصير غبرة زمن وبغلّ بالحلوين
الموتى اللي تحت الارض ما بيعرفو يعيشو
شروقي
بسوزي اتصلت وقلت: كان الغضب مفلوش
وما كان عقلي معي لما برمت بوزي
بيصر زماني امل لما كنت قاشوش
وهلق ليالي الجمر برماد مهزوزه
ما بقيت إحمل وجع حطي عا جرحي رشوش
نبال العيون الخضر بالقلب مغروزه
وغمر الهموم المعي اكتر ما بقدر حوش
وما ضلّ مني حدا تا تقدري تعوزي
الشلحو عليكي النظر قالو برف رموش:
جبالك جبال الألب والدمغ فيروزي
جايي لعندك، صرت عا مفرق "بحبوش"
مطرح ما كنتي معي عالحيط مبروزه
وعالبيت لما وصلت والوقت كان دغوش
دقيت باب الفرج وصرخت: يا سوزي
طالع عا بالي اللحم فاقع بطن فتوش
وغيرك يا ست الحلا ما في الي اوزه
بابك يا حلوي افتحي، جند غرامي جيوش
عليي بهمس ولمس مش ممكن تفوزي
قالت: يا روحي انا هلق بنص الدوش
جاوبت: يللا افتحي وخلي الصدر عريان
من قماش ريقي الحلو بخيطلك بلوزه
شروقي
قودم عليّي الفنا يوم النهايه لاح
وقلب العوافي انقطع لمّا انقطع قوتي
حصدت الخساره أنا وعم غنـّج الأرباح
وقت اللي طلعت معي زيتونتي توته
همّي كتبلي الشقا، صارت حياتي نواح
ما قدرت طعمي الصبر عالهم فتفوته
شفافي ما قدرو يجو عا موسم التفاح
كلو عا إمو اهترى وما وزع كروته
مع كل طلعة فجر بعمل الي زيّاح
والروح لبست ضجر من شرح لاهوتي
وهرّو رياش العمر ما ضلّ عندي جناح
انزرعت طريقي فشل والحظ حنتوتي
ماشي بعتم الدني ومرافق الاشباح
مطلق حريم الحكي ومزوّج سكوتي
غابو اللي كانو معي وقت الكنت مرتاح
وهلق بغيبة انا فزعان اني موت
وما يكون عندي حدا يحمل تابوتي
شروقي
هالعصر عصر الشقا نص الشعب بقرون
وكلما الغلاظه تجي بتدرس قسم تاني
والضيف قلبو حجر تا يفدغ القانون
"النازل بقفه" معي بيطلع مخرباني
شهرين عندي قعد بالبيت "بو انطون"
ويا ريت خلـّى طقم يقعد بالخزانه
دبّغ تلاته وجلف صباط افلاطون
جاني هديه عا عيد البيّ يا زماني
وكبّوت حقو حمل صار بشحم مدهون
وكنزه بلون التلج صارت باتنجاني
ورباط عنقي خزق من كتر مو ملعون
وقمصان جنس "الارو" صارو بلا ديانه
وقبة جاكاتي جوي ووحياة مار مارون
ضليّت صابر رغم ما كنت عم عاني
سجّل غراضي الو من الطقم للكلسون
وفنجر عيونو وانا انسان انساني
منو نجوم الضهر شفت ولحقني جنون
لكن بحقو الاحد ما قصّر لساني
ولما قالتلي المرا رايق ما فيك تكون
هزّيت راسي وقلت لك كيف بدّي روق
تضحّك عليي ابو انطون بسناني.
شروقي
يا عاشقين الشعر صار الجنون فنون
ما ضل عنا كرم يصفـّر عنقودو
مش بس مل الشعب صار الظرف ملعون
وما عاد بدو حدا يوقف على حدودو
نحنا عطينا الشعر ضمه وفتح وسكون
وخردق زمننا التقى بنهار بارودو
واللي بكسر الوزن عم يكسر القانون
بدنا فدائي برسن عا المعرفه يقودو
كتار البيقولو لنا بدهم شعر موزون
وهني لعهد الدرج والعرج بيعودو
الشحرور وصى الحرف عا منبر بدادون
تا يهز جسم الوحي ويشمّر زنودو
منحب نقشع زخم بتراثنا معجون
ونشوف لون وصور بتحّمر خدودو
ان كان بدنا حدا بقلب الحياة نكون
ضروري اسود الشعر نعرف من قرودو
يقول خبير عسكري ان الجيش الاسرائيلي يستعد لخوض حرب تحت الارض لا فوقها خصوصا ان حزب الله يمتلك عشرات القواعد المحصنة تحت الارض التي يستخدم بعضها لادارة المعركة وتوجيه المقاتلين.
صولو يا ناس بها الدني وجولو
يوم الشقا رح نعلن وصولو
طول الحكي ما منعرف من العرض
كتار البيقولو حرب تحت الارض
وقلال فوق الارض بيقولو
نحنا عا ضهر خيولنا سرجنا
واللي مشي بلا قاعده حرجنا
منقولها هلق عيان بيان
صوت الحرب تحت الارض ان كان
احسن ما فوق الارض يزعجنا
راحة فكر يا عالم اعطونا
ومن تقل دم الحرب عيفونا
كلمة حرب افعى لضخ السم
بتجوي السمع وبلفظها مننسم
بلا حرب دخل الرب خلونا
اعطينا الصبر يا ربنا اعطينا
بلبنان نحنا قلوبنا نسينا
لا كهربا عندو ولا عندو موي
والخي عم بيصير ضد الخي
وتا نقول هوني خي ما فينا
نحنا جماعه ربنا عبدنا
وصوب المحبه الدرب عبّدنا
عليها الارض بتقول نحنا ضيوف
جينا على الغربه تا راحه نشوف
مشاكل ما بدنا و حرب ما بدنا
هموم وشقا عا كتافنا حملنا
والمستحيل بها الدني عملنا
والنا زمان نقول بالصرخات
كلمة حرب بتجبلنا الآخات
والسلم بيجيب الفرح النا
منـّا من ال بيكنفشو منا
لا فرق بين الاحمد وحنا
اعطونا بدايه ما لها نهايه
وعا الدرب ان شفتو الحرب جايي
قولو الو تا ينقلع عنا
يا عشاق الشعر يا تقبروني
اذا صرفتو الضجيج بتقبضوني
بزماني الحرف ما شاف المصايب
فنوني عارض بعارض جنوني
الوحي ولا يوم عني كان غايب
والالهام ما بيمشي بدوني
تحت باطي جمال اللون جايب
وتا حتى شوفكم جايب عيوني
كلامي مر ساعه وقطر دايب
الجرايد بالطقس بيشبهوني
اذا بيكون فيي الظن خايب
عن المنبر من شلوشي اقبعوني
رفاقي بحيت عندي فكر صايب
من بحور المعنى تصيدوني
وتا حتى يصير شعر الليل شايب
مع المشروب صارو يقدموني
كنار الروض ما قلي قرايب
وبلابل ها العصر ما بيعرفوني
قبل ما بكلمتي اعمل عجايب
بلحظه واختها من هون بنزل
اذا بدكم عا صوتي تحاسبوني
نحنا بشر عا الكنفشه ربينا
وما في حدا أخلاق يعدينا
منعشق الليره منعبد الدولار
والذوق ما بيعرف اسامينا
لساناتنا عا بعضنا منشار
وكبر الدني ما عاد يكفينا
ببيع الضمير مننحسب تجار
وتا ننجرّ خوازيق ما نسينا
لا تفكرو جينا بتقل عيار
ما في حدا منا ابن سينا
الله بصقنا وقالت الأخبار
عا الارض من جنة عدن جينا
ما في حدا للكذب مش سمسار
مطرح ما نحنا مننتهي بدينا
منحكي بليونه وقلبنا من حجار
وما في زمان دروس يعطينا
بالشر فينا نكمل المشوار
وتا نكون متل الناس ما فينا
مش بس انو ما لنا دبار
جوينا الدني وتقنشح التفكير
منا يا رب الكون نجينا
يا نخوة شعبنا من القبر قومي
البليّه شلحت علينا بلاها
لأنو بالوطن عنا حكومه
عا ذكر "الافضل" الافضل بلاها
رئيس بلادنا فصّل طقومه
لحالو ولبّس الأعين عماها
ما فينا ناكل البنج العمومي
بسنين المية ألف يحرق سماها
الفقر بيقول عم تكتر همومي
ما داقت علتو طعمة دواها
ووعود الطايره منها خدومه
تا تعطي الصبر اكتر ما عطاها
ما بدو مجلس النواب يومي
لطريقه تحط عالقدره غطاها
لأنو مزوّر ومثل فلومي
وحكاية سعلتو الراوي رواها
الزراعه بموطني صارت لغومه
يمين الزارع تقطش مداها
بساعة مرفعك يا جياب صومي
انصرف رسمالنا بدرب الكرامه
وغريب الدار حطـّم مستواها
