الصفحات

ننشر في هذا الموقع أشعار الشاعر الكبير عصام ملكي

الطبعة الثانية من ديوان شربل بعيني زينة الشعّار

صدرت الطبعة الثانية من ديوان "شربل بعيني زينة الشعّار" للشاعر عصام ملكي، بعد أن أضيفت اليها عشرات القصائد التي أهداها من قلبه الكبير لصديق غربته، وهذا نادراً ما يحدث، إلا عند العمالقة لألف سبب وسبب. وقد شرح البعيني هذه الأسباب في مقدمة الديوان، ولكي تبقى اشعار المحبة والتقدير خالدة نرجوكم النقر على الغلاف وقراء الكتاب الكترونياً. 

مدلع الايام


يا شايفه فيي الف انه
حان الوقت تا تعرفي اني
مع كل نسمه عم بودّي سلام
وانتي ما فيكي تعرفي تحني

قولي يا دلو عيشتو اوهام
ملبس دموعي خلقة البني
وبالرغم اني مدلع الايام
كلما التقينا بيهربو هني

النظره ما فيها تحقق الاحلام
عليها اذا قانون بتسني
اعطيني مجال يخفف الآلام
وخلي الضحك يتفسد بسني

صار الورق عا مسرح الاقلام
متل الحما بالبيت والكنه
والشعر اسمو صار صف كلام
وما في بيوت بجوها تجني

لا تطلبي اشعار يا الهام
وللقافيه والوزن لا ترني
منوين بدي اجمع الالهام
وكيف بدي اوصل على الجو
ما زال هربانه السما مني



شرقط ولوعي


بصرتك بنومي ناطره رجوعي
وساعة لقاكي معلقه بكوعي
وكلما جروحي مرحبا غنو
يوقف نزولي بخلقة طلوعي

خيالك ضروري تعرفي انو
راسو لقي عا مخدة ضلوعي
وقلي تا حتى اسالك عنو
تا يشوف كنو بعدك بتوعي

هلي شريعة بعدنا سنو
قالو ما لازم يمرق قطوعي
ولما كشفلي القهر عا سنو
طار الصواب وشرقط ولوعي

موضوعك  برسم الدرس منو
وما تعرف على الحل موضوعي
حلن بقا القلبين يتهنو
بساعة زمان وينكسر جوعي

الواقع بعدما مواقف تبنو
وفاش على بحر الشعر مشروعي
كل العواطف بلشو يجنو
واكلو عيوني صورة العا الحيط
وصارو خدودي يشربو دموعي

صرخة الموجوع

قالت الي بشلحات عينيها
وين النتيجه اللي وصلت ليها
قلتلها ماشي عا خط النار
وان كان بدو يطول المشوار
معلق دني عا الحيط بالمسمار
ساعة ما بدي برجع عليها

لكلمة حياة بتلبق الزقفه
وقت البيكون العز بالوقفه
جوعي لكي صور لقانا رغيف
وتا تعرفي بالعمر نحنا كيف
من هم حبي صاير شقاقيف
وانتي عم تضلي فرد شقفه

بدرب الغرام بتهلك الوقعه
ولقمة حنان بتوصل لوقعه
بيدوب قلبو العا الهوى محسوب
وقلب التلج بالعاطفه بيدوب
وقت اللي عنو بتبعد الصقعه

مش عارفه يا بنت الحكايه
اني عا دربك رايح وجايي
بوصفك ما بقدر قلل المصروف
خواص الفكر عم ادلقو بحروف
تقدر تعبي عيونك قرايه

ضحك القدر


بوجه الحروف تجمعو قلامي
وسافر عا غير بلاد الهامي
ولما عملني القهر متل العود
صبري انشلح عا الارض قدامي

بطلة جمالك ما بقا موعود
وقفو عقارب ساعة دوامي
وصار العطا بيناتنا محدود
لما زرت لبناننا الشامي

ناطر تا شوفك والوقت محدود
واسمك بقي عا راس الاسامي
طفران ما بقدر لعندك عود
لارض الغريبه نادر عضامي

ومش رح بغني مخمس المردود
لشقفة دني ولا قيم القيامه
ما في بعب الفكر طقس برود
تا قلك على الضيم لا تنامي

لا تسألي عني وعن الموجود
وكنو الحديد بموقفي حامي
بالعتم عايش والزمان شهود
واليوم صارو يسمعو الطرشان
ضحك القدر عا دقن ايامي

فراغ


قومي قبل ما تطول النومه
ما زال صارت تحرز القومه
حزبي غرام مسجل بقلبين
لا حزب الله ولا حزب قومي

من غربة حضوري بعين وزين
جايي تا اكسر باللقا صومي
خلي الحنان يطوف عا الميلين
احسن ما يوقع عا العطف لومي

مبارح فركها وساعتو شهرين
واليوم اسمو يومك ويومي
طلعنا بنزلة حب عين بعين
وقلنا التفاهم خبزنا اليومي

بهمس ولمس منحقق الحلمين
خيالك ما فارق يقظتي ونومي
وعنا صداقه عمرها سنتين
وعا شبر ميي مساقبه العومه

حمتي عا عمري بين هون ووين
وعا دروب فكري دعسة الحومه
مالي قلب شوفك ببو العين
عين اللي منها بشلح النظرات
صار الفراغ بقلبها كومه

شكل الصبر


ضجة وما وصوت السكت عالي
وطلق خيالي رفقة خيالي
ببير الشعر عم يغرق الاسطول
وعا الحيط ما بيوقف شغل بالي

كلما بطوفة ذكرياتي جول
وتستعرض اللهفات احوالي
بشوفك جمال على الطلب معمول
وفيكي الهوى عم يحمل رساله

اول لقا كان بشهر ايلول
وقلتلك مجنس استرالي
ما عرفت اني بدولتك مقبول
لوما انا فيكي شفت حالي

بحبك لانك ماشيه عا اصول
شموخك نزل عا الارض كرمالي
وقلبك وقلبي عم يدقو طبول
وصار الهمس واللمس موالي

وهلق لانو البعد شامط طول
وشكل الصبر ما عاد يحلالي
عا درب فيها طعمة المجهول
رايح تا عنك اسال النسيان
وآخي ورايي وصرختي قبالي.

شم اصحا تدوق


هلي شفت طرقاتها بعيده
حكيت معي عا قافيه جديده
وزلغط لقانا عا جسر ميفوق
لما قلت من هون لا تحيدي

تمنيّت لنو الدرب مش مطروق
تا كنت اعمل باللقا عيدي
ويكون حظي عا الظرف مدلوق
وبالحب ما غير تقاليدي

ومن كتر ما فيها كنت معجوق
طعميتها آخر زواويدي
وصار الحنان مرّقد ومرقوق
ومشيت بضاعة ايش بتريدي

ولما بجسمي توترت العروق
وجاب الصدى للصوت رديده
قالت بغنجه روق نتفه روق
مش هلق بتقطف عناقيدي

ووقت اللي قالت شم اصحا تدوق
صافحتها من بعد تنهيده
وقلتلها بدقة قلب محروق
بصف الحضانه سلامك وكسلان
بدي سلام يعلم بايدي

السبعين غنو


انا من هون رايح يا جماعه
عيوني نوسو وعزمي تداعى
بعدما حفترو الدمعات خدي
صرت عم اقشعو خرج الزراعه

ولأنو ما بقا عم شوف حدي
لحالي قلت اقبرها البضاعه
المفاصل يبسو من شمس حدي
وعبكرا بيوصل نهار الفراعه

بجسم الحاملو زاد التردي
وقالو هيك عني بالاذاعه
خريفي شرّف ومجبور صدي
عا نقلة اجر بدي ربع ساعه

انا اللي كنت قنطارين هدي
بايدي وكانت ترحلي الشجاعه
وعناتر اشلح وعا البحر ودي
كأنو المرجله عندي صناعه

و"هاني" رجّفو لو كان ضدي
وبزندي كانت تعيش المناعه
وفطاحل كنت كابش بالتحدي
وهلق بعدما السبعين غنو
بدل حط الكباش بحط طاعه.

بحطك بكاسي


يا ريت مني مفضل شويه
تا ودع الاخات يا بيي
وافرش قبل عا خيالك المصلوب
عا خشبة بصابيص عينيي

ورشك حنان واطرشك بطيوب
وقلك بظل عواطفي تفيي
وخلي العطر من شفتك مسكوب
كلما مزادك يوقع عليي

وافتح كفوفي وطالع المكتوب
بريشة قدر عا خطوط ايديي
تا قول نؤمن من صميمي وتوب
وخلي الابانا تقترب ليي

وكلما تيابو يغيّر الاسلوب
قلك معي مستقبلك هيي
ولقمة جريكي تنعرض لدروب
كل يوم عم تاكل من جريي

ومن بعدما تدوبي بغرامي ودوب
ويصير جسمك يدلف مويي
بحطك بكاسي وبعملك مشروب
وبضل مزمز حب ليل نهار
تا اسكر ويسكر حواليي


ماشي الكسر

ببيت القصيد مفسّخ التلييس
وماشي الكسر ومرافقو ابليس
وكلما نجي تا نمعجن الاشعار
بيبعت ورانا الحف والتجليس

فلان الفلاني عا الشعر بيغار
والهدم عندو بينسمى تاسيس
وكلما نفخ صدرو باستهتار
بتبرم عقارب ساعة التنفيس

واحمد مشي عا قلة الدبار
وقلو زمانو مسجلك تلبيس
وحنا انحسب من جملة الكفار
وما في ابانا تعملو قديس

هلي علينا مثلو ادوار
ودقو بزنود الادعا نواقيس
قالو دهبهم ما التقالو عيار
ونحنا جماعه منعرف التلبيس

بدنا شعر بالتلج يقدح نار
وارض الهشيم يرشها فراديس
مش كل ناظم بيت "روكز" صار
تسعين بالميه من الشعار
غربان عم يتقلدو طواويس


الى الشاعر الفلسطيني الكبير حاتم جوعيه

بمناسبة الاعياد المباركة، وبسبب كثرة الاحداث وتلاحقها، وغدر العالم أجمع بحقوق الشعب الفلسطيني، ما كان من الشاعر المهجري عصام ملكي إلا أن أهدى هذه القصيدة المعبّرة بألم لصديقه الشاعر الفلسطيني الكبير حاتم جوعيه:

يا حاتم الدّم بشراييني
بيغلي غلي وعا الباب تشريني
مش عم بشوف بها الدني استقرار
وتا إقعد على السكت ما فيني

محتار شو بعمل صرت محتار
همّي استقام وجاب دزينه
قلال الأوادم والغلاظ كتار
وما في حدا أفراح يعديني

حضرة أوباما بآخر المشوار
بوزو برم مع بوز قنّينه
بعهدو ما حط على الكلام بهار
وهلق سحب عا الوضع سكينه

والنتن ياهو متل هتلر صار
لسانو طويل ورقبتو تخينه
مش رح يخلّي لا أرض وحجار
وبيقول منّو دينكم ديني

البيقول إنّو بالصبر دبّار
قلّو متل من فضلك اعطيني
ورجاع قلّو يشغّل الأفكار
بها العصر ما عنّا صبر أيّوب
عنّا صبر شعب الفلسطيني