غضّ النظر يا رب عا الانه
وشفلي شو بسوى اليوم تمنني
مترين حيطي بالدني وطيت
واللي بقي من العقل هو هني
ضيف على حالي ما قدرت لفيت
ومات الضحك لما انقبع سني
وعقدة زماني بعدما حليت
بلمح البصر صار الدمع بني
راحه الي قلتلها ما لقيت
ومني مناضل بعترف اني
من شق فكري عا الدني طليت
وشفتك عا شغل البال بتعني
تمنيت وحياتك انا تمنيت
تردي العقل وتبطلي تجني
صاير وجودي بين حي وميت
انهزي بقا وعا مصيبتي حني
صار الامل عم يزغر ويا ريت
بالعمر عم يزغر كبر سني
ايدي تا اخد حسنتك مدّيت
ان كان بعدك طايره بالجو
شوفي السما شو بدها مني
لمي الوقع عا الارض واعطيني
طفران صرت ومحترق ديني
لا بيت عندي ولا إلي عنوان
ولولا انا مش منعرف ميني
عندي وجع قلب ووجع اسنان
ومن كل شغلة بال دزينه
وقاعد عا ذكرى فضلة النسيان
وحاطط بخلقة كاس قنينه
بسدني الجسد والروح من لبنان
مش رح بتطلع يا تقبريني
وحفيان حظي والوضع تعبان
وطوفان دمعي وصرختي سفينه
لا تحسبيني فارس الفرسان
ماشي زحف عا الدرب هديني
العقرب بدمة ساعتي هربان
وتا الحقو عا الوقت ما فيني
دبلو عيوني والنظر نعسان
ورح ينشف الدم بشراييني
وضايع ما بين الكفر والايمان
مني ما فيكي تستعيري نهار
بالدين جايب آخر سنيني
طل الفجر تا يساير السمرا
العم اقعد وامشي تحت امرا
وجات الشمس تا تفيق العتمات
الغفيو ورا برداية الحمرا
وصار الندي من وصلتو مرايات
لما الصقيع استقبلو بغمره
علق بزهره مرافقه الدرجات
وبين على سيقانها شمره
وغنى البرد للموقده ابيات
انو ما فيكي للدفا جمره
وفاق الشعر عا دعسة الردات
الكانت بشرشف سكت منكمره
وبجو خمري بعد خود وهات
عا الكاس لما صارت الضمره
قلت السكر رح افرضو عا الذات
هوني الحلا وهوني جمال القد
والجو هوني طعمتو خمره
الايام يا الهام محدوده
حدودك لحقها نشاف ما حدودي
ما ضل عندي للعلاج دوام
عقرب مصيري بساعة شرودي
خلي حنانك يرفع الاعلام
حتى بورودك فتح ورودي
كلما عليي تمثلي افلام
بيكبر سنه بالعمر مجهودي
لا ترحلي عني باستسلام
بيصعب عليكي ترجعي تعودي
من الدرب شيلي علامة استفهام
وجمر البسي لا تلبسي بروده
كلما عليي يكترو الاوهام
بتحبحب الآخات عنقودي
وكلما بعيوني استوطنو الآلام
معاول دموعي بيحفرو خدودي
بنور الشمس ما عاشت الاحلام
ومنها ليالي النار موجوده
ومحتار شو بعمل بها الايام
تقمص وجودي التبغ والتنباك
وما في زمان يسوكر وجودي
لبناننا بنوار اطروحه
وقوس القدح للعطر مرجوحه
والسحر عندو محل بالاعراب
وضيعتي منها حجر وتراب
كمشة سما عا الارض مشلوحه
هونيك تارك غبرة شبابي
ببيت العتابو بعين منصابه
الحيطان هرّو بالعرض والطول
وكلما حجر يوقع بيصير يقول
رايح تا حتى شوف اصحابي
من شلحة عيوني عرفت اني
رح اقشع بقلبو الف انه
ريح الشمالي فرم الشباك
والباب لما منسألو شو باك
بيقول راح الزنبرك مني
بيتي لانو كترت جروحو
حسيت انو طالعه روحو
من هيك لما طاف دمع العين
دقيت بابو وقلت قلي منين
دخلك عا بيت الشعر بيروحو
صارت همومي من البرد شقعه
وعريان لا كنزه ولا رقعه
والسقف عم يدلف حمال موي
والنسمة الكانت جمر وشوي
مرقت عليي محمله صقعه
وهوني انا عم ادرس الحاله
وسعر الفرح اغلى من الغالي
صباغ التعب لما عليي حل
وما عدت لاقي للطموح محل
من تحت راسي علقت مع حالي
طالع عبالي هالزمن بيعو
بعقاربو الساعات بيضيعو
فيه الكذب اسمو ابو الهمات
بطوفة حكي بيمرق مع الكلمات
كلما مشي عا راس صابيعو
رح جن لا مكفى ولا موفى
باجري نعل والدرب متحفى
بعيده المسافه والدمع طوفان
وما في امل اوصل على لبنان
حظي بيوم ولادتو توفى
الرجعه برقبة درهمي معلق
والظرف لا مزوج ولا مطلق
يمكن عا حالي صرت شاهد زور
ومن كتر ما فيي الارض بتدور
بعدان صرت محسبو هلق
شاعر انا وبفراغ ايديي
عبيت اوراق الحواليي
عندي الطلاقه والوحي بالدم
بنظم الشعر والله ما بعتل هم
حروف الهجا بيتقاتلو عليي
التقينا من بعد ما نسيت حالي
عا مفرق بيتها وزاد انفعالي
وبنظره واحده رويت غليلي
ونقلنا الحب من حاله لحاله
جميله اسمها وهيي جميله
وجميل بوصفها تسجل مقالي
ونظملي شعرها بوزن الخليلي
مقاطع من صميم الارتجالي
قالت بعشقك قلبي دليلي
وانا قلتلها زهره بخيالي
وصرت شمشون تا تعمل دليله
وبساعة حب تشغل كل بالي
هيي بالغزل منها قليله
وانا مش هين وصاحب رساله
الها قلت ما بعبر سبيلي
عصير شفافك دموع الدوالي
ما بدي عجّل بساعة رحيلي
ولا بدي كون واحد انعزالي
تا حتى تضل ليلتنا طويله
وصوت الضو ما يطلع علينا
تعي عا الفجر تا ندلق ليالي
مطفي بزر بلوزك اضويني
شارب طلوع الضو قنينه
وطاير صوابي وللعما سكران
يا تقبريني لشوفتك جوعان
شلحة نظر عا الريق طعميني
قولي شو بدّك خلقتي بقلع
صوت المشي عا السكت ما بيطلع
رحتي قبل ما تزهري بنوار
وما زال ما تلعوس معي المشوار
كيف بدّي غيبتك ابلع
لهت الخساره طيّر المربح
وشلحة عيونك موسها بيدبح
تا عيش بالاوجاع ما بيجوز
كلما معي تكوني حبق مهزوز
الريحه عا صهوة دمعتي بتسبح
مبارح بحلمي قربت ليكي
ولقمة حنان طعمت ايديكي
ولما العرق منك عليي فز
وشفت الهوا من مطرحو ما انهز
دفشتو تا حتى يوقع عليكي
يا مربعه بالفكر تربيعه
غنيتك بابيات لميعه
ولما لقيتك زخرفه والوان
خيوط النظر حيكتها منشان
تالبسك عا العيد تطليعه
حناني بدمعة عيوني تألف
وقبل من نار لشفافك مولف
صباحي بالدني صرتي ومسايي
ونصيب الملتقى بوعدك مغلف
كبر همي متل ابن الحكايه
وتا حظي يقوم بالواجب تخلف
وما بقدر عيش ايامي بلايي
وجودي كتير عا وجودي تكلف
تا عكزّ ما قدرت لاقي عصايه
حياتي زحف والمشكل مسلف
وكفوفي ما التقو بساعة قرايي
وعذابي بلا استقامه تنين خلف
غريبه كتير لغة مستوايي
وما جاني من السما مترجم محلف
وزماني طلق عيون العنايه
ومن الضربات تكفيري تجلف
انا ورقة خريف بظرف جايي
وتا حتى اوصل لعندك مكلف
بعدما تطالعيني بالنهايه
عا صدرك علقيني ربع ساعه
قبل ما ترجعيني عا المغلف
ـ1ـ
كلارك البعيني ما هجر عيني
بشحطة قلامو بينعرف ويني
بشربل بأقلامن طلع جبّار
عنّي حكي ودلاّ عا ناس كتار
مليون ألف عليه يا عيني
ـ2ـ
عطرو بيضل بهالدني فايح
عليها متل غيرو إجا سايح
البيكون متلو مستحيل يموت
ولو كان جسمو سافر بتابوت
لعند القرايب بالسما رايح
ـ3ـ
علينا المنيّه ساحبه لسانا
وصار الفرح عنّا خبر كانا
قنديل عمرو قبل ترمو ناس
وقت اللي قالو انقطعت الأنفاس
طاف الدمع بعيون روزانا
ـ4ـ
ومن وين بتجيب الصبر راحيل
آخات صارت دون قال وقيل
عا كلارك هلّق دمعها جاري
وقلبا انسلخ من قبل عا ماري
ليل ونهار بتحمل الإنجيل
ـ5ـ
فراقو ترك شربل بغيبوبه
وعندو الكلام تقمّص صعوبه
مش بس إنّو عواطفو جنّو
الأبيات هللي قالها عنّو
مش بالقلم بالدمع مكتوبه
ـ6ـ
كلارك البعيني جبلتو إيمان
صاحب قلم والمقدره طوفان
شاعر ما هوّي بس هالإنسان
ببيت الشعر ما بيقبل فساويخ
بشربل بأقلامن عمل تاريخ
دقّه بقلوب العارفينو كان
بقدّم تعازي لعليتو ولبنان
**
الرجاء قراءة التعازي تحت القصيدة
