الصفحات

ننشر في هذا الموقع أشعار الشاعر الكبير عصام ملكي

الى والدي المرحوم قيصر ملكي

عندما وصلتني هذه القصيدة من الشاعر عصام ملكي، لم يتبادر الى ذهني إلا ذلك المثل الشعبي القائل: "اللي خلف ما مات"، فكم بالحري اذا كان الابن شاعراً كبيراً تخضع له القوافي، فكيف سيلف النسيان ذكرى والده، ولو بعد سبعين سنة من رحيله؟: "النسيان حتى يدق بحروفو فشر". 
أجل.. فشر. فكل بيت في هذه القصيدة يحكي حكاية ابوة رحلت غدراً في عمر الورود، وبقيت خالدة في قلوب الأبناء والبنات والاحفاد "تا تموت الدني"
رحمك الله أيها الوالد الخالد قيصر ملكي.. فلقد أعادك ابنك عصام الى الحياة وكأنك تعيش بيننا الآن:
ـ1ـ
إسمك يا بيي قلال نسيو من البشر
النسيان حتى يدق بحروفو فشر
بساعة رحيلك خيّم الجو الحزين
ومن كتر منّا فيك نحنا مولعين
صارو الوصايا عندنا احدى عشر
ـ2ـ
إلنا التعازي جات من باني وبني
قدام رسمك كل ساعه مننحني
قلبك علينا كان ومسجل لنا
بلسان نحنا كلنا بقلك أنا
بيضل ذكرك حي تا تموت الدني
ـ3ـ
كان البلا عا الجو داعس بانزين
وكنا شو هوّي الموت منّا عارفين
"أطفال" كنا وما حدا عندو كيان
وطبه عا خردق اختنا بهاك الزمان
خلقت قبل ما ينعملك أربعين
ـ4ـ
ما بين يوم ويوم يمكن اقشعك
والرب إسأل وين حاكم موقعك
بمطلع شبابك من خلف ضربك "لعين"
وهلق عا ذكرى عمرها كومة سنين
حبيت إني بالوهم إحكي معك
**

منظر مختير

قالو الاهالي روح راضيها
الكوره جمال الرب عاطيها
ووقت اللي قالو بضيعتك بتدوخ
من بعد غيبه رجعت بالصاروخ
تا شوف بشمزين شو فيها

ولما عيوني جوها جابو
لقيت المناظر ختيرو وشابو
والعشب رابي مطرح اللي ربيت
وبالرغم اني كتير رحت وجيت
ما قدرت شوف الضارب حسابو

الليمونة الكانت عا ايديها
تحمل تمر وتشدنا ليها
لما لقيت الطول فيها عرض
وقعت الذكرى من الفكر عا الارض
وصار التراب يعربش عليها

ويبست التينه الكانت محطّه
وكنا عليها كتير نتسطّى
ونجاصة الوقفت بوجه الريح
عا الارض صارت وانتهى التطويح
عطيت قفاها واخدي غطّه

ومن بعد جوله بقلة مروّه
ولّفت حالي لرجعتي بقوّه
وقلت بسكوتي ودمعتي طوفان
والله ما كنت رجعت عا لبنان
لو كنت عارف صار مش هوي

دمعتي وقيّه

مبارح رحت عا المقبره بهمه
تا زور ستي الفاضله وامي
وزن الحكي ما قدرت اعرف كيف
الكلمات صارو ينزلو شقاقيف
بدقيقة الفيها فتحت تمي

صار الوجع للراس عرقيّه
وهَمّي بلاد ودمعتي وقيّه
امي لها بالفعل مقبرتين
وحده "بركوود" ظاهره للعين
طول الوقت والتانيه فيي

امي بحوش فكارنا فلّه
قلنا لها بالدمع لا تفلّي
بغيابها صارو عيوني قزاز
كل يوم عندي بالفكر جناز
وبكل ساعه آخ يا دلي

اللي بيعرفوني بيعرفو اني
بغيابها ببكي دمع بني
مش بس صاير من انا ممقوت
ميتين مره بالنهار بموت
وعا الاخره راحت قبل مني


جنازة حياتي

انا عايش عا انّه بضهر انّه
وانتي عايشي عا القرصعنه
جيتي غصب عا الدنيا لأنّك
منها رح تروحي غصب عنّك
وانا رح روح متلك غصب عني

الدني ما عاد فيكي تعرفيها 
تا حتى تفلّ عنا كلّفيها
الذي بيقلك تقولي ابانا
عا وجه الارض ما نسّم هوانا
لانو العالم شياطين فيها

ما عندي من الأماني ربع كمشه
وعحيبه ما شفت تا يرف رمشي
الاوادم من قبل ما جيت ماتو
انا انسان بجنازة حياتو
قبل ما يموت صرلو شهر يمشي

انا بالهم عا اخر سنيني
عا قول الناس ما تقرّص عجيني
بعد ما صار ليي الشوق مبرح 
صرت بقبش عليي بكل مطرح
اذا فيي التقيتي خبّريني

عا راس شفافها

تعو يا عواطفي غارات شنّو
لانو بها الظرف معروف انو
مكانه ما بقى عندي بمكاني
اجاني هم واستاجر زماني
ولهلق ما وصلّي قرش منو

الغضب عا حبنا فالت رياحو
ولقانا ما قدر شبّق جناحو
ما بعرف ليش فيها العقل ساحب
عا راس شفافها بتبقى المراحب
وانا من جوارحي بتطلع صباحو

انا قلتلها القبله دوانا
ما النا بالدني نحنا سوانا
وتا حتى بالهوى عقّل جنوني
حاطط نؤمن بشلحة عيوني
وبقلب المرحبا شوية ابانا

وعدت قلتلها من الضرب اوجع
جفاكي وما التقى للحل مرجع
معك ما زال ما نسّم هوايي
انا من هون رايح عا النهايه
وما بعرف عا الحياة منين برجع

إلى العزيز بيار هدهد سكّر


قصيدة جديدة رائعة يهديها الشاعر عصام ملكي لصديقه ابن بشري البار بيار هدهد سكر

يا بيار مِنّك ما حدا تنكّر
بيضلّ جوّك بالوعي مسوكر
مش بس إنّو بمعرفه مجبول
عنّك بسدني الجالية بتقول:
سكّر كلامو وعيلتو سكّر.

نحنا ما فينا غير نشتقلك
بيضلّ فينا منشغِل عقلك
من حيث عندك بالحياة طْموح
ما في حدا يقلَّك تعا أو روح
غير عْلى عقلك ما انزرع حقلك.

بشرّي لها بقلوبنا موقَع
معها علاقه ما حدا بيقطع
جبرانها عا الكون بعدو سِيد
وبتقول هيّي والكلام بعيد:
ببيار هدهد حالها بتقشع.

مخْلص وفي ما بيكسر القانون
عا دمّنا وعا قلوبنا بيمون
بعيوننا هوّي أبو الهمّات
هيهات متلو يلتقَى هيهات
هيكي الرجال تكون أو ما تكون.

ضيعت ذاتي

قالت هنا رح ينشف الدم الزكي
ولما رحت تا شوفها وقول اضحكي
لقيت الدمع لعيونها جاب العما
وكان السكت مشلوح قدام الوما
وما في حرف عم يقدر يمشّي الحكي

قلتلها بالعمر ما نلت المنا
وضيّعت ذاتي وما قدرت شوف الهنا
وتا شوف حالي قبالها فتّحت عين
وبقبشت عنّي بين وين وبين وين
وهم اللي شفتو كبير حسبتو انا

قالت تفضل والحكي طلّع صدى
والها قلت انو الخبر والمبتدا
قالو ما عندك مقعد بقلب العرين
ردّت وقالت من ظرف اربع سنين
متعّوده بالبيت اقعد عا الهدا

ولما النعم من تمها انبدلت ب لا
ولما ما بيني وبينها انقطعت صِله
آخ الهوى رجعت لعندي من جديد
وقلّي زماني روح عا مطرح بعيد
سألت الطريق منين بيروحو الى

ريحة الزعتر

قومي تا نمشي عا المشي معوّد
بجاه اللي نام شهور بالمزود
غطّو الطيور ونقوَدو الزيوان
والسود مش غربان يا ايمان
بمَوت الدني عم يلبسو اسود

بنتفة غطيطه الجو متستّر
ومعليش لولا عا الشمس شفتر
الفلاح حامل سِكـّـتو والنير
وعطر الورد عم يعمل مشاوير
بنسمة هوا مع ريحة الزعتر

قالت يا قلبي روِّق شويه
راح الوقت من بين ايديي
وراح الربيع وراحت الالوان
وكل التراب مشوَّب وعطشان
وما في غيوم تفنتِر مويه

ورجْعت تقول بشلح عينيها
لما صرت ابرم حواليها
خلـّـيك هوني بالف عين وزين
الطرقات عما تبوّس الاجرين
وما في حدا عم يمرق عليها

حلم

مبارح بحلمي رحت عا بلادي
وصرت بسكوتي مطرحي نادي
ولما وجودي صرّف الاعمال
الذكرى القديمه عزمتها عا البال
وصرِّت الي الالوان زواده

والولدنه جات برغم سني
لما عرفت بالمنطقه اني
وعا ريحة الماضي رميت سلام
ومطرح ما كانت عيشتي احلام
عا الارض ما بيّن شقف مني

ومن بعدما حرّكت الهامي
عمري نقز عا ذكر الاسامي
ولما لقيتو دخن سواكير
نزلو دموعي بطلعة التفكير
وصار الوجع بالراس قدّامي

لحالي قلت لما انقطع لوني
بضرب الرمل ما بينعرف كوني
ورجعت قلت الهمّ عندي حلّ
هلق انا قاعد بغير محلّ
وغبرة زماني قاعده هوني

آخر زياره

لما لوجودي خيالها صوفر
عنّ عْلى بالي روح عا صوفر
قلت القعد بالبيت مش مقبول
المرفع اجا ومفروض اتزفـّـر

ومفروض ما يبقى الفكر مشغول
ما زال صار الوقت متوفـّـر
اخر زياره كانت بأيلول
لما طلعت بالمعركه مظفـّـر

ما بحب شوف الهجر شامط طول
بايام فيها عواطفي معفـَّـر
بالامس كنت من الوضع مخجول
وكان السكوت من الحكي اوفر

كلما اجاني ظرف صول وجول
بلاقي خيالي من المدى منفـَّـر
ببحر الشعر عم ينزل الاسطول
وما في حدا عا القافيه تسفـَّـر

من هيك هلق بالصراحه بقول
كفري بكلامي والسكت اكفر
مش بس عم شوف الطريق نزول
ما لي قلب اتنشق النسمات
فزعان لا يكون الهوا اصفر


خراب

مكرسح خيالي والقلم خيّال
ورايح وجايي الهم والبلبال
ما في تفاهم ضل بمحلّو
كل اللي كانو بالفكر فلّو
ووحدي انا قايم بشغل البال

واقع بنقطه خاطري المجروح
وما في خلاص لحالتي مطروح
شو بعمل بها الكون متحيّر
كلمة يا اهلا لونها تغيّر
وصارت حياتي لعند غيري تروح

بأيّا لسان مواقفي بهنّي
ما بقيت عم بيِّن متل منّي
الايام جابو من الهموم حمال
وصعبه برضايي صرِّف الاعمال
ان كان ما بيوقف "غصب عنّي"

ما قدرت اهدا بين ايديي
وبعدو عليي بيبرم عليي
وكيف بدّي وصِّل سلامات
وفشخه ما عندي تلعْوِس مسافات
عا دروب عم تاكل من جريي


طل الحكي

لما خريف العمر عا بابي طرق
حلم اللي كان بجيبتي كدّو العرق
وضعت بانا وما بقيت اعرف شو بني
ولما لقيت مسكّره بوجهي الدني
قناني فراغ الوقت عبّيتن عرق

قلي الوحي من شوفة خيالي ارتعب
وزت الورق بالنار والريشه زعب
وساعة ما شفت معاكسه كل الظروف
صرت بدموعي نطّل جرين الحروف
لما عليهم سجل نفوسو التعب

دخل السما حبّيت صوتك اسمعو
وشكل الحلو طالع عا بالي اقشعو
الموسم الو مده طويله ما قَبَل
وجايي تا حتى ازرع شفافك قُـُـبَل
تا شوف كنو بكلمتين بيطلعو

ما عاد بدّي بها الدني ساير حدا
طل الحكي عا السكت وقوام انعدى
وهلق معي ما بقيت اعمل واجبات
شلت الخبر من بين دين الذكريات
تا علّم النسيان كيف المبتدا

يوم الكيف

من شي شهر وشوي عا علمي
قدّام عينيي فرشت علمي
وما عاد تمشي لغة التعبير
ولما لقيت تجلغم التفكير
جبرت الحرف ينقل من الكلمه

الانسان عا خيّو برم بوزو
وشلح الصنوبر طلق كروزو
اليوم الصداقه اسمها وسواس
حامل عا ضهري مرحبا يا ناس
وحاطط بايدي سلام ما بعوزو

كاس الوجع بالراس شاربها
وكاس الخمر ما بقيت قاربها
قاعد لوحدي والمراره ضيف
وكيف بدو يعيش يوم الكيف 
بساعات عم تعقص عقاربها

دمعي نزل طوفان عا حالي
وما في امل تتغير الحاله
وما في امل تالروح تاخد روح
ايام عا النسيان عما تروح
وايام عم تطلع عَلى بالي


شو بقي منا

لما زمانك يوم رخّصلي
مرقت ولقيت اللون مش اصلي
ولما القلب بمصيبتو تمرمغ
نهارك سعيد بمرحبا تدبّغ
وما ضل عندي للحكي وصله

عندك جسد هربان تجميلو
خلي الاراده نصحك تشيلو
لا تسمّعيني بستّرو بتياب
وما بتركو يبيّن على الاحباب
نصحك اذا ما بيّن بينشم
ومَنها بعيده ينلقط بالدم
كل نقطه تقلها كيلو

صرتي بْلا طعمه بعدما كبرتي
تخمين هلق للشلح صرتي
ما ضل فيكي من الحلا نتّوف
فيكي كنت لون الطبيعي شوف
وهلق صرت عم شوف اخرتي

وعندي انا التجعيد ما تجدّب
اسس عا وجهي وعمّر وسردب
وبالحردبه لما لقيت العيش
عزّيت حالي بكلمة المعليش
قوس القدح من زغرتو محردب


وديت ليي

تلج القلب رح يقلب مويي
وحب الشباب مفرّخ بديي
وما بين شقفه من المضى والان
واقف عا مفرق والدرب حفيان
ويمكن رجوعي يوقف عليي

وساعة ضجيج تحركو ديها
بعقارب بتبرم حواليها 
وريح الشمالي ما قبل يرتاح
سيره فتح مع شجرة التفاح
الما في تياب تحاتني عليها

وبالرايح شويه شفت بقعه
من الارض منها للنظر وقعه
حط الدفا عا جسمها كنزه 
لكن ما جاها من الوصل همزه
لما طلع زنارها صقعه

ومن بعدما صار الضغط عالي
ودّيت ليي من انا رساله
وفيها قلت صاير حديثي صراخ
لكن ما رح اترك درج للآخ
منشان ما يطلع عَلى بالي

بالهوى وقعنا

لما ما عدنا هَجْرِنا بلعنا
قلنا ضروري يقوم مرفعنا
وقلنا البعد ممنوع عمرو يطول
وعا ها البنا عا بياض وقّعنا

ولما ابتدينا نطالع المعقول
متيله لجوع النفس سمعنا
وقلنا تا نبقى هيك مش مقبول
ما في صبر بالكون ينفعنا

ومنشان يفرض وهرتو المكفول
اطول قـُـبل عا شفافنا طبعنا
كلو لأنو بالعرض والطول
تفشكل نظرنا وبالهوى وقعنا

قلتلها جسمك الي معمول
وقالو الايادي للدقر جعنا
من بعد جوله بعالم المجهول
عدنا لطيبة قلبنا رجعنا

ومنها طلبت تا نجمع المحصول
ما زال صارت فارقه معنا
وبعد العطا والاخد صرنا نقول
اليوم الغزل ما بينتهي بكير
بدو الطرح عا الارض يجمعنا

عزيمه

الوحي الخلاّق مش لابس تيابو
وحضورو صار متقمّص غيابو
وما عادت تطلع الكلمه صبيه
بعد ما قوافل الاخات شابو

وانا للاخ رح صفّي ضحيه
وجع راسي ما بعرف مين جابو
ومنها وارده اعمل خطيه
بعدما الكفر قبّرتو شبابو

عزيمه عْملت كرمال الشهيه
بعدما الجوع اعلن انقلابو
وتا حتى يكون عندي قابليه
اجا المشروب هوّي ومرحبابو

زمان الكان ما عندو هويّه
عطيتو وانفتح عا الكون بابو
وتا حتى تطلع النبره القويه
جبرت الفكر يدلق من جيابو

ورحت مشوار صوب الابجديه
تا خلّي الوضع يطلع من عذابو
وقلت الها بلسان الشاعريه
ما عندي حرف يركب بالقوافي
تا اقدر بالوزن احسب حسابو


مات الخيال

جوع النفس صاير بَلاَ ديانه
كلمة يا عيب الشوم نسّاني
كلما عيوني يسايرو الحلوين
جرح النظر بيصير جوّاني

بساعة جنون تركت بشمزين
وجيت عْلى سدني وختير زماني
ومن بعد عمر سألت عني مين
وكان الجواب فلان الفلاني

ولما وجودي برطل تشارين
تا اقطع مسافات احزاني
سدّت بوجهي وقلت الله يعين
وكاسي طلب ايد الدملجانه

وبعد الترندح ست سبع سنين
وقفو الابر فوق الاسطوانه
ومات الخيال وسافر التلوين
وصار السكت موّال الغناني

ما بقيت اقدر اطبع دواوين
وانظم شعر ما في الو تاني
حروف الهجا عن جد دوّارين
صبح ومسا ما بيقعدو بالبيت
وما في حكي بيدور عا لساني


قيم القيامه

بتمي صار عم يعرج لساني
وسكوتي للحكي وجّه اهانه
الحراره عاليه والطقس بارد
والي يومين بالمجهول شارد
ومعي ما عاد يتركلج زماني

وقفت عا منبري وغنّيت مطلع
لأنو مصيبتي ما قدرت ابلع
قلت يا حظ لا تشفتر عليي
لأنو للمشي منهم جريي
عا بالي ما بقا ولا يوم اطلع

نجوم الضهر عم شوف بمنامي
لانو من الهوى التفكير دامي
قلت للقالت الموّال عيدو
اذا لسانك عليي مد ايدو
بلحظه واختها بقيم القيامه

اتركيني عايش بقلب الخطيّه
سنيني عا الارض منها عبيّه
انا غير شكل عن كل الخليقه
عليي بتمرق الساعه بدقيقه
كتر ما بتركض الايام فيي


ندي مطعْوَج

نحنا عا حفة هالدني صرنا
وعم نحفر بدينا مقابرنا
قومي عا صرخة حلمك وحلمي
خيال الفجر عم يكحش الظلمه
وهوني صباح الخير ناطرنا

فصل الربيع الارض متزوج
رش الحلا عا ترابها وروّج
والوردة الاحلى من الرسمه
لما عليها دعست النسمه
صار الندي عا وراقها مطعْوَج

وقال الجمال من الدرب حيدو
الخيرات عندي بلّشو يزيدو
وبالشجرة القدام باب الدار
عصفور عم ينظم الِك اشعار
وعم تزمط الاوزان من ايدو

ظروفك ضروري يقابلو ظروفي
شوفي شو صاير بالهوى شوفي
مفروض يوصل للفجر موّال
كنّو النعس عندك طويل البال
زيحي تا حدك نام نـتـّـوفه


حام النحل

يا مغمّضه عا الحب عينيكي
ليكي شو صار بحالتي ليكي
كلت العذاب مرقّد ومرقوق
وما كنت عارف طعمتو هيكي

ودّيت صوتي عا وتر مخنوق
من هيك ما حوّل عا دينيكي
ولما التقينا عا جسر ميفوق
شلْح النظر عربش عا اجريكي

ولما مرقتي مبارحه بالذوق
حام النحل عا زهور خديكي
وصارو الشباب يكوكزو بالسوق
ويتغزَّلو بموجات نهديكي

خلصنا بقا من شم اصحا تدوق
الاحلام عم تبرم حواليكي
ومن كتر مني لشوفتك محروق
قلب المسافه بفشختين كبار
رح اقطعو تا اوصل عليكي


بيتي

وحياة عينيكي يا عينيي
شوقي فلت من بين ايديي
لعندي تعي لا تبعتي مرسال
ان كان بدك تمرقي عا البال
قاعد انا بالرايح شويه

شقاقيف مني بتقدري تلمّي
كلمة يا دلّي عايشه بتمّي
عمرت بيتي من تلات جماع
بحجار حمرا مقصّبه باوجاع
وعملت سقفو آخ يا امي

ولما بعتلك عا الهوا سلامو
خيالي شلح بوسات قدامو
وجرّب يجيبك من ديار الامس
شافك بنومو للهمس واللمس
وناطر تا حتى يفسّر بنامو

ومش بس مش عم يعرضو كتافو
ماشي زحف تحقيق اهدافو
رايح وجايي حد باب الدار
يمكن اذا ما بتعملي مشوار
بقوام عمرو يقلب شفافو

حلو زماني يكسر صيامو
وتتغيّر عْلى الارض ايامو
علينا المنّيه من الخلقنا فرض
مش عارفي النامو عمر عا الارض
بدهم عبكرا تحتها ينامو



ايامي تعرّو

سنيني عا الارض عشرات هرّو
وهجرني الكيف وهمومي استمرّو
ما بقدر اقطع تذاكر نصيبي
اذا من صرخة المربح تبرّو

يا انتي مساطرك مش عم تجيبي
لجوع النفس والصدفات فرّو
صرت عم شوف اطباعك غريبه
وراهم مشكله للعمر جرّو

لدقّ القلب مش عم تستجيبي
وعليي بعرف عيونك تغرّو
ودوايي ما قدر يعمل عجيبه
لأنو مشاكلي زواويد صرّو

بعد ما كانت مروجي خصيبه
وعناتر شعر بخيالي تدرّو
صرت شوف المراجل بالهريبه
ومن الخيرات ايامي تعرّو

انا بالفاعل مشغَّل طبيبي
لأنو بالوجع آخات قرّو
اتركيني عا السكت احمل صليبي
ما بقدر سمِّعك ردة معنى
اذا التفكير مش عارف مقرّو


جوع النفس

يا نور عواطفي بالعقل طارو
وما عندي مين يفرشلي بجوارو
زمان محبتك عني تخلّى
نهار الاربعا وغيّر مسارو

اذا بالعاطفة قلبك تحلّى
غرامي بيرجع يتلت عيارو
لأنك نبع والاشواق ملّو
لحناني بعدما فضيت جرارو

اذا عا مذبحك ما عاد صلّى
وجودي بالدني يخرب ديارو
شدي همتك بالحب يلله
تا يرجع للتفاهم اعتبارو

عليكي باصبعو الالهام دلّى
وغرامي عا السكت طلعت خبارو
ولأنو بْلا وعي حمّص وقلّى
بدنب الليل عم يوصل نهارو

غرامك نار والواقع تجلّى 
وعيوني من عدا بصابيص صارو
بلا انذار والله والف والله
عا بالي بسحبة التفكير جيتي
وجوع النفس اعلن انتشارو
    

الحقيقه بقولها

يا شعّار الزجل الوان هاتو
لبيت الشعر تا يفرح بذاتو
ما بدنا نجوّعو ويحكو الجرايد
وبقلب المجتمع نقطع لهاتو

لازم نزرعو ونحصد فوايد
ونعرض للوجود مقبّلاتو
ما بدنا نموّتو بسجن الشدايد
ضروري يكون عايش انفلاتو

هجرنا بلادنا وعنّا عوايد
وكلام الجوهري منعرف صفاتو
املنا نشوف بالميدان قايد
تا معنا تنفتح سيرة نجاتو

ما بقدر كون يا رفاقي محايد
الحقيقه بقولها الهمات ماتو
تا نقدر بالوحي نجمع طرايد
وعلينا العصر يدلق التفاتو

وتا يبقى فضلنا عا الشعر زايد
وجحيم الموت نبعد عن حياتو
لازم بالوما ننظم قصايد
المعنى قال انو الابجديه
ما فيها حرف مش طالع خواتو

جوع القلم

يا هند جايي ضبضب غراضي
مدماك ما تعمّر عا انقاضي
منك اذا ما بجيب استقلال
رح انقبر من هون عا الماضي

يمكن عا عمري سيطر الاهمال
ومش بس ما بتنطاق امراضي
من الهم عندي صار نص شوال
وزاحف عا وجه الارض عراضي

مَرْقت عليي بالدني اهوال
المجرم طلع عا منصتو قاضي
وبالرغم ما جوع القلم خيال
بأسمو ما عاود سجّل اراضي

لا تسالي عني وعن الاحوال
لساعة غنا رح جيب بعواضي
بالدفش مش عم يطلع الموال
وعا وراق بيضا للوجع ماضي

بالمال عندي كان شغل البال
واليوم مَنّي عا الوضع راضي
الكلمه بعدما تبخّرو الاموال
"يا ريت بقدر واجه المصروف"
"بجياب منو فكرها فاضي"



الى روح المرحومة تراز زوجة حنا الشالوحي

توفيت في داربعشتار- لبنان  المرحومة تراز زوجة حنا الشالوحي، وهو ابن عمّة السيدة يولندا، زوجة الشاعر عصام ملكي. وقد رثاها الشاعر ملكي بهذه القصيدة:

ولادك "تراز" بروح مقهوره
بآخات عم بيسايرو الصوره
ولا يوم قالو الدمّ اسمو مْوي
منشان تبْكي الأبجديه شوي
دلْقو دمع بحروف مقصوره

عليكي الحزن متسَوكر جْنونو
ما في حدا ما حرّك سكونو
قالت "يولندا": خسِرتْ شوفتها
و"حنّا" اللي هوّي ابن عمّتها
نتفة دمع ما ضلّ  بعيونو

ولادِك وزوجك والحَوالَيكي
يْروحو ويجو ويبوّسو دَيكي
تا يقْعدو عا السكت مش معقول
كنتي اللطيفه المخْلصه عا طول
مين الما بدّو يزْعل عليكي؟

يا إمّ رشيد الحقّ ما بُوفي
بالشعر مهما ساعَدو ظْروفي
ولادك بيقولو وكلّهم إحساس
بتاني دِني رح تلْتقي بـ "الياس"
وكلّ اللي راحو لفَوق بتشوفي

بْقدّم تعازي لكلّ "شالوحي"
ولقْرايبينك حِكْيت جروحي
بالإسم رحتي وباقيه بها الكون
ما في حَدا بيقول مَنّك هون...
مْن البال مش رح تقدْري تروحي

عا الريق

اوقفي يا قاطعه مسافات فيي
تا نفتح بالوما سيرة قضيه
اذا بيمشي زمانك مع زماني
الشمس بتصير تشرق من عشيه

بعد ما الفكر ضيّعني لقاني
عا مفرق درب مجهول الهويه
ما بقبل اقعد بصف الحضانه
بعد ما حفظت كل الابجديه

انا اسمي الحبيب الاولاني
وحياتي صايره هلق ما هيي
ما بقدر بالضعف ارفع كياني
اذا عا الريق باكل صيدليه

اسمحيلي قول هلق عن لساني
اذا ما منلتقي منعمل خطيه
العرق منشيل من سجن القناني
وبعد كم كاس بتصيري صبّيه

انا بالملعقه طعمتك حناني
ضروري ضحكتك تطلع وقيّه
قبل ما ننقل عْلى كون تاني
تعي تا ندوق طعمة مستوانا
اذا للحب عندك قابليه

انتليو عيوني فراغ

عنك بعيد وكبرت العنه
وناطر تا حتى تسألي عني
وبعدو وجودي قاطع الانفاس
وبعدي الو آخات عم غنّي

ما في امل صلِّب بخمس حواس
ما زال انتي مخيّبه ظني
قلتي ما بدك تشربي من الكاس
وبعرف انا انو بتستمنّي

قعدو براسي الهم والوسواس
وهنّي اساس المشكله هنّي
الظاهر زماني اعلن الافلاس
وجايي خيالك بالعزا يهنّي

ما ضل عندي من كياني اساس
واني انا ما بينعرف اني
مش عم بلاقي للظروف قياس
وحب الاجا تعبان جنّني

حسّيت اني صرت عم ايباس
وما في امل يزغر كبر سني
ومن كتر ما بشلح نظر عا الناس
انتليو عيوني يا عيوني فراغ
وما بقيت عم اقشع حدا مني


آخ يا بيي

ماشي ورايي وشاحط جريي
بايام برمت بوزها عليي
تا شوف هلي ما لها دبار
ورجِّع زيارة حيّها لحيّي

ومرقت عليي ست يا ستار
شافت عذابي وقالت خطيي
وصارت متل ام الحنونه تغار
وقدّامها هرهر حواليي

ولما اجاني من الهوى انذار
لطوفة دمع اجّرت عينيي
وقلتلها بأمرك وجودي صار
وحَب الشباب استفتح بديي

الها خصر ما بيلزمو زنار
بينقال عنو اخ يا بيي
وسحبة جسد بتجيب استنفار
للي بيحبو لحمة النيه

وهونيك صار التلج متل النار
ورايح وجايي جوع ايديي
ولما عملت عا جسمها مشوار
ولقيت حالي صرت بدّي ضيع
قلت لحياتي روّجي ليي



ماشي على الايدين

هلّي ما بقدر غير استحلي
جرة عسل وشفافها نحله
شباكها دقّيت من يومين
وما كانت الشباك تفتحلي

جرّبت سايرها بعين وزين
وما في تفاهم عين رجّحلي
وحبّيت ما اترك عليي دين
حتى يا ولدي جميل تربحلي

قلتلها ما بريدك بلونين
منوين انتي؟ قال من زحله
قلتلها ماشي على الايدين
وكفتا معك مش نافعه الزحله

جايي تا حتى حقق الحلمين
وخلّي ضمير الحب يرتحلي
وما بتقبلي تقولي خلاصي منين
وما في ظرف بالايد لولحلي

ومن بعد ما رحت عْلى آخر وين
صار اشتياقي رجوع يشرحلي
ولما رجعت عا غلاقة السنتين
قالو شو صرلك قلّنا يا "سام"
قلتلهم دقت الي الهام
وقالت تعا والدرب سلكحلي


جايعه شفافي

جرّبت اسهر والوحي منشّف
والريق ناشف والوجه انشف
وجاني نعس تا يسوكر جنوني
بصبوص بدّو يغمّض عيوني
وبصبوص بدّو اتركو مكشّف

صنين كنت ودابت تلوجي
يمكن صرت للكون همروجه
عنّي ابوها ما بقا ينقال
الكلمه اللي فيها كنت شوف الحال
من دعسة الالهام مطعوجه

حاجي عا درب البال تختالي
صارت بلون الزفت احوالي
لا تسأليني منين رحت لوين
التفكير عندي ما الو اجرين
منهيك ما بيوقف شغل بالي

عنّي بعيده وجايعه شفافي
وكاسك معي بيروح عا الصافي
وكرمال انو شفتك تنمصّ
عن اعمل الفشخه بشكل مقصّ
تا قصّر فساتين المسافه


طلعت زرّيع

اوقفي يا عايشه فيي هنيهه
الحقيقه بالارض ضربت جريها
الهوى بالختيره لا شك عيبه
المرايه الكنت احملها بجيبي
هلق صرت عم اوقف عليها

اسمحيلي كرّ كبكوبة لساني
وقلّك ليش طلّقني زماني
غرامي وزّع عْلى الحب طيشو
ولهلق موسمي ما عرفت ايشو
طلعت زرِّيع تحت السنديانه

ما بيني وبين انا زاد التحدّي
ما بدي ها الدني وبقول بدّي 
العمر سهران وبقلبي حريقه
وتا اقدر غمّض عيوني دقيقه
ما عندي راس بيساير مخدّه

شعر عا العيد ما بجبلك هديه
لانّو داعس فرامات فيي
وببحرو صار عم يندب نشافو
الوزن عا القافيه قالب شفافو
وبلا اخلاق حرف الابجديه