الصفحات

ننشر في هذا الموقع أشعار الشاعر الكبير عصام ملكي

هيدا انا

يا عاملين على الهوى محضر
لا تواخذوني انما قدرت احضر
صابيع ديي مش خرج تمليس
بشجرة حياتي غلغل اليبّيس
وما ضل في عندي غصن اخضر

ما في طبيب على الزند شمّر
آخي طويله والوجع عمّر
وجرح القطع قلبي عرفت انّو
من ساعة الفلتو القطب منّو
صار الحكي عا شفتو احمر

حق الدوا لليوم ما توفّر
حتى زمان القهر يتسفّر
وين الطبيب القال اخصائي
يقلي اذا رح ينعرف دائي
رح هرّ عن حالي صرت اصفر

من هالدني ما بقول متشكّر
عليي زمان الختيره بكّر
لما مرقت عا مراية البدار
تطلعت فيها وقلت يا ستّار
هيدا انا؟؟ ما بقيت اتذكر

0 comments:

إرسال تعليق